Газар зохион байгуулалт, геодези, зураг зүйн ерөнхий газраас НҮБ-ын Хүнс, хөдөө аж ахуйн байгууллагын дэмжлэгтэйгээр зохион байгуулж буй “Газрын эрх зүйд тулгамдаж буй асуудал” хэлэлцүүлэг орон даяар үргэлжилж байна.
Хэлэлцүүлэгт төрийн болон хувийн хэвшлийн 30 гаруй байгууллага, мэргэжлийн холбоодын 600 гаруй төлөөлөгч танхим болон цахимаар оролцож, газрын тухай хууль тогтоомжийн хэрэгжилт, хөдөө аж ахуйн газрын эрх зүйн өнөөгийн байдал, маргаан шийдвэрлэх эрх зүйн тогтолцоо зэрэг өргөн хүрээний асуудлыг хэлэлцэж байна.
Мөн тусгай хамгаалалттай газар нутгийн эрх зүйн зохицуулалт, газрын маргааныг захиргааны шүүхээр шийдвэрлэх онцлог, БНСУ-ын газрын эрх зүйн тогтолцоотой харьцуулсан судалгааны үр дүн, шийдвэрлэх арга замыг ч хөндөн ярилцжээ.
Энэ хэлэлцүүлэг нь УИХ-ын 2024 оны 181 дүгээр тогтоолоор баталсан “Монгол Улсын хууль тогтоомжийг 2028 он хүртэл боловсронгуй болгох үндсэн чиглэл”-ийн хүрээнд Газрын нэгдсэн бодлого, эрх зүйн зохицуулалтыг сайжруулах зорилготой бөгөөд талуудын саналыг бодит ажил болгох эхлэл гэж харж байна.
2025 оныг “Иргэдийн итгэлийг хүлээсэн төрийн үйлчилгээний жил” хэмээн зарласан тус агентлаг иргэдэд үзүүлэх үйлчилгээний чанар, хурдыг сайжруулахын сацуу хууль, эрх зүйн орчныг бүх шатанд хянан сайжруулах зорилгоор “Иргэдээ сонсоё” аяныг орон даяар эхлүүлээд байна.
Эх сурвалж: Газар зохион байгуулалт, геодези, зураг зүйн ерөнхий газар
