“Орфей” театрын уран бүтээлчид таван жилийн ойдоо зориулан өнгөрсөн хугацаанд үзэгчдэд хүргэсэн жүжгүүдээ дахин олны хүртээл болгож эхлээд байна. Энэ сард Хятадын зохиолч Үй Хуагийн “Амьдрахуй” туужаас сэдэвлэсэн “Амьдрахуй” драмын жүжгийг толилуулсан бол ирэх сард Английн алдарт зохиолч Жорж Оруэллийн “1984” романаас сэдэвлэсэн “1984” постдрамын жүжгийг тайзнаа дахин тавина.
"1984" жүжгийг ирэх сарын 2-ноос Тусгаар тогтнолын ордонд тоглох бөгөөд жүжгийн гол дүрд МУГЖ С.Болд-Эрдэнэ, Д.Ганцэцэг нар, туслах дүрүүдэд АЖ Г.Равдан, МУГЖ Ц.Төмөрхуяг нарын жүжигчид тоглоно.
Мөн ирэх намар И.В.Гётегийн насан туршдаа бичсэн зохиол гэгддэг “Фауст” зохиолоос сэдэвлэсэн “Фауст” постдрам, Ф.М.Достоевскийн “Гэм зэм” романаас сэдэвлэсэн “Гэм зэм” постдрам, “Broadway” театрын алдарт бүтээл, АНУ-ын зохиолч Жон Патрикийн “Everybody loves Opal” жүжгийг “Опал” нэртэйгээр дахин тавих юм байна.
