“Эрдэнэс Тавантолгой” ХК-ийн 1072 ширхэг хувьцааны ногдол ашгийн үлдэгдэл болох 93499 төгрөгийг маргааш /2025.04.10/ олгож эхлэнэ гэдгийг ЗГХЭГ-ын дарга Н.Учрал  Засгийн газрын өнөөдрийн ээлжит хуралдааны дараа мэдээллээ.

Мөн хувьцааны ногдол ашгийн үлдэгдэл мөнгийг ямар хэлбэрээр авах тухай И Монголиа аппликэйшнээр дамжуулсан санал асуулга өнөөдөр хаагдана. Иргэд хувьцааны мөнгөө бэлнээр эсвэл Хөгжлийн санд хуримтлуулах, Хуримтлалын дансанд хадгалах сонголтын аль нэгд нь саналаа өгөх боломжтой.

 “Эрдэнэс Тавантолгой” ХК 2024 онд 30.4 сая тонн нүүрс олборлож, 29.6 сая тонн нүүрс борлуулж, 4.5 их наяд төгрөгийн цэвэр ашигтай ажилласнаар нийт хувьцаа эзэмшигчдэд ногдол ашиг хуваарилахаар болсон. “Эрдэнэс Тавантолгой” ХК өнгөрсөн оны цэвэр ашгаас 1072 хувьцаатай иргэн бүрд 350 мянган төгрөгийн ногдол ашгийг гурав хуваан олгохоор шийдвэрлэж, өнгөрсөн оны арванхоёрдугаар сард 1072 хувьцаатай иргэнд 121500 төгрөг, цагаан сарын баярын өмнө 100006 төгрөгийн ногдол ашиг олгосон. Өнгөрсөн удаагийн ногдол ашгийн олголт 97.5 хувьтай байжээ.

Иргэд ногдол ашиг авсан эсэх, болон бусад мэдээллээ авахыг хүсвэл 158989 гэдэг дугаарт регистрийн дугаараа кирилл үсгээр томоор бичиж мессежээр илгээхэд мэдээлэл ирнэ. Мөн ТҮЦ машинуудаас ногдол ашгийн мэдээллээ авч болно. Үнэт цаасны данс нээлгээгүй иргэд ч дансаа И Монголиа цахим хуудсаар хандаж нээлгэх боломжтой болсон байна.