Засгийн газрын Хяналт хэрэгжүүлэх газар болон Монголын Бүтээмжийн төв хамтран төрийн байгууллагын үйл ажиллагааны чанар, бүтээмжийг системтэйгээр дээшлүүлэх, улмаар олон улсын түвшинд жишиг болох загвар байгууллагыг бий болгох төслийн бэлтгэл ажлыг хангаж байна.

Тус төслийг хэрэгжүүлэгч байгууллагаар Нийгмийн даатгалын Ерөнхий газар (НДЕГ) сонгогдсон бөгөөд энэ нь төрийн албаны бүтээмжийг нэмэгдүүлэх, иргэдэд үзүүлэх үйлчилгээний чанарыг сайжруулах, цаашлаад салбарын сайн туршлагыг бусад байгууллагад түгээн дэлгэрүүлэх боломжийг нээж өгнө гэж үзэж байна.

“Төрийн байгууллагын төгөлдөршил, загвар байгууллагын төсөл”-ийг хэрэгжүүлэх гурван талт гэрээнд:

• Засгийн газрын Хяналт хэрэгжүүлэх газрын дарга Ч.Өнөрбаяр

• НДЕГ-ын дарга Б.Батжаргал

• Монголын Бүтээмжийн төвийн гүйцэтгэх захирал Я.Эрхэмбаяр

нар гарын үсэг зуржээ.

НДЕГ-ын дарга Б.Батжаргал:

“Хоёр жилийн өмнө манай салбарт процессын дахин инженерчлэл хийж, Нийслэлийн нийгмийн даатгалын байгууллагыг нэгтгэн зохион байгуулалт сайжруулсан. Үр ашиггүй орон тоог цөөлж, шат дамжлага, хүнд суртлыг багасгах бодлогыг баримталж байна. Цаашид үйлчилгээг илүү хүртээмжтэй болгоход чиглэсэн арга хэмжээг хэрэгжүүлнэ” гэж онцолжээ.

Энэхүү төсөл хэрэгжсэнээр сайн засаглал төлөвшиж, төрийн байгууллагууд иргэдэд ээлтэй, ил тод, үр дүнтэй ажиллах суурь нөхцөлийг бүрдүүлэх хүлээлттэй байна.

Эх сурвалж: Нийгмийн даатгалын ерөнхий газар.