Зам, тээврийн хөгжлийн сайд Б.Дэлгэрсайхан Европын холбооны Элчин сайд Ина Марчюлёните, Европын холбооноос Монгол Улсад суугаа төлөөлөгчийн газрын хөтөлбөрийн менежер Арно Апприю болон БНХАУ, Монгол Улсыг хариуцсан газрын дарга Ауво Кайкканен нарыг хүлээн авч уулзлаа. Уулзалтын үеэр Монгол Улсын хамгийн их ачаалалтай чиглэлүүд болох Лүн-Хархорин болон Замын-Үүд-Хөшигийн хөндий чиглэлийн авто замыг дөрвөн эгнээ болгож шинэчлэх төслүүдийг танилцуулж, эдгээрт Европын холбооны хөрөнгө оруулалтыг татах санал тавьжээ.

Зам, тээврийн сайд Б.Дэлгэрсайхан:

“Замын-Үүд-Эрээн боомтоор өдөрт 1000 гаруй машин нэвтэрдэг, манай улсын нийт импортын 78 хувийг энэ чиглэл эзэлдэг. Иймд эдийн засгийн ач холбогдолтой, ачаалал ихтэй замууддаа хөрөнгө оруулах нь оновчтой шийдэл юм” хэмээн онцолсон байна.

Европын холбооны төлөөлөгч Арно Апприю хэлэхдээ:

“Бид “Тэрбум мод” аяны хүрээнд ойн хөгжлийн төслүүдийг үнэлэхээр ирсэн. Тээврийн салбар бол манай анхаарлын гол чиглэлүүдийн нэг. Тавигдсан хоёр төслийг зээлийн шаардлагад нийцэж буй эсэхээр нь судалж, боломжтой бол санамж бичигт гарын үсэг зурах бэлтгэл хийнэ” хэмээн мэдэгджээ.

Мөн Европын хөрөнгө оруулалтын банкнаас Монгол Улсад үйл ажиллагаа явуулж буй Европын байгууллагуудыг оролцуулсан форум уулзалтыг ирэх 10 дугаар сарын 13–14-нд Улаанбаатар хотноо зохион байгуулах талаар мэдээллээ.

Энэхүү уулзалт нь Монголын авто замын дэд бүтцийг шинэчилж, бүс нутгийн логистикийн чадамжийг нэмэгдүүлэх, олон улсын стандарттай уялдуулахад чиглэж буй чухал хамтын ажиллагааны эхлэл гэж үзэж байна.

Эх сурвалж: Зам, тээврийн хөгжлийн яам