УИХ-ын даргын 42 дугаар захирамжаар байгуулагдсан ажлын хэсэг өнөөдөр хуралдаж, уламжлалт мал аж ахуйд уур амьсгалын өөрчлөлтөөс үүдэлтэй сөрөг нөлөөллийг бууруулах, хөдөө аж ахуйн үйлдвэрлэлийг дэмжих бодлого, арга хэмжээг эрчимжүүлэх асуудлыг хэлэлцлээ.

Ажлын хэсэг нь “Шинэ сэргэлтийн бодлого”-ын 4.2, 4.4-т заасан зорилт, УИХ-ын 2022 оны “Хүнсний хангамж, аюулгүй байдлыг хангах талаар авах зарим арга хэмжээний тухай” 36 дугаар тогтоол, 2024 оны “Малын гаралтай түүхий эдийг боловсруулах үйлдвэрлэлийг дэмжих тухай” 63 дугаар тогтоолын хэрэгжилтийг судалж, бодлого, хууль эрх зүйн орчныг боловсронгуй болгох чиглэлээр ажиллаж байна.

Хуралдаанд УИХ-ын гишүүн Ц.Идэрбат, Ц.Ганхүлэг, Д.Үүрийнтуяа, Б.Бат-Эрдэнэ нар оролцож, ажлын хэсгийн ахлагч М.Мандхай даргалан удирдав. Энэ үеэр “Цагаан алт” үндэсний хөдөлгөөн, “Шинэ хоршоо” хөдөлгөөний явц, хэрэгжилт, үр дүн болон тулгамдаж буй асуудал, гарц шийдлийг хэлэлцлээ.

Ерөнхийлөгчийн Эдийн засгийн бодлогын зөвлөх Б.Даваадалай “Цагаан алт” хөдөлгөөний хүрээнд ноос, ноолуур, арьс шир, хөнгөн үйлдвэрлэлийн бүтээгдэхүүний борлуулалт, зах зээл, брендинг, маркетингийн асуудалд анхаарах шаардлагатайг дурдсан бөгөөд түүхий эдийн чанар, бэлтгэлийн тогтолцоо, хүний нөөцийн хомсдолыг мөн онцолсон байна.

Мөн хуралдаанд Монголбанк, Төрийн банк, Зээлийн батлан даалтын сангийн төлөөлөл оролцож “Шинэ хоршоо” хөдөлгөөний хөрөнгө оруулалтын асуудлаар мэдээлэл хүргэсэн бөгөөд ажлын хэсгийн гишүүд зээлийн батлан даалтын нөөц, эргэн төлөлт, эрсдэлийн судалгааны шинэчилсэн мэдээллийг шуурхай хүргэж, салбар хоорондын уялдаа холбоог хангах чиглэлээр ажиллахыг хүслээ.

Эх сурвалж: УИХ-ын Хэвлэл мэдээллийн газар.