Хүнс, хөдөө аж ахуй, хөнгөн үйлдвэрийн яамны Газар тариалангийн бодлогын хэрэгжилтийг зохицуулах газрын дарга Д.Есөн-Эрдэнэ Оросын Холбооны Улсын “Эконива” компанийн төлөөлөгчдийг хүлээн авч уулзлаа. Уулзалтын гол зорилго нь хоёр улсын газар тариалангийн салбарын хамтын ажиллагааны боломжийг судалж, туршлага хуваалцах, ирээдүйд хэрэгжүүлэх төсөл, хөтөлбөрийн талаар санал солилцох байв.

“Эконива” компани нь ОХУ-ын хэмжээнд нийт 13 бүс нутагт үйл ажиллагаа явуулдаг, 632.4 мянган га газар тариалангийн талбай, 116.5 мянган саалийн үнээтэй, өдөрт дунджаар 3700 тонн сүү үйлдвэрлэх хүчин чадалтай хөдөө аж ахуйн салбарын тэргүүлэгч аж ахуйн нэгж юм. Тус компани нь олон төрлийн тэжээлийн болон хүнсний ургамлын үрийг үржүүлж, арвай, улаанбуудай, хошуу будаа, шар буурцаг, вандуй, сэвэг зарам, маалинга, царгас зэрэг таримлыг тогтвортой байдлаар тариалдгаараа онцлогтой.

Уулзалтын үеэр ГТБХЗГ-ын дарга Д.Есөн-Эрдэнэ Монгол Улсад хэрэгжүүлж буй “Атрын IV аян”, газар тариалангийн бодлогын үндсэн чиглэл, хууль эрх зүйн орчин, урт хугацааны зорилтуудыг танилцуулсан байна. Тэрбээр сортыг сайжруулах, сорилт хийх, селекцийн судалгаа, техник, технологийн шинэчлэл зэрэг чиглэлд хамтран ажиллах өргөн боломж байгааг онцолсон юм.

Цаашид хоёр талын мэргэжилтнүүд харилцан туршлага судалж, Монгол орны хөрс, уур амьсгалд тохирсон ургамлын сорт боловсруулах, шинэ техник, технологи нэвтрүүлэх, сүү, тэжээлийн үйлдвэрлэлийн чиглэлээр хамтын ажиллагааг өргөжүүлэх талаар нарийвчилсан судалгаа хийж, санамж бичиг байгуулах боломжтой талаар ярилцсан байна.

Эх сурвалж: Хүнс, хөдөө аж ахуй, хөнгөн үйлдвэрийн яам