Засгийн газрын Хэрэг эрхлэх газар Бүгд Найрамдах Солонгос Улсын Олон улсын хамтын ажиллагааны байгууллага (КОЙКА)-тай хамтран “Монгол Улсын Төрийн албаны гүйцэтгэлийн удирдлагын тогтолцоог бэхжүүлэх нь” төслийг 2023-2025 онд хэрэгжүүлж байна. Уг төслийн гол зорилго нь төрийн албаны шинэтгэлийг дэмжих, гүйцэтгэлийн удирдлага, хүний нөөцийн тогтолцоог боловсронгуй болгох, төрийн албан хаагчдын ур чадварыг нэмэгдүүлэхэд чиглэжээ.
2025 оны 4 дүгээр сарын 4-нд “Чингис хааны музей”-д зохион байгуулсан хэлэлцүүлгээр төслийн хүрээнд боловсруулсан гурван үндсэн тайланг танилцуулсан юм. Үүнд:
-
“Монгол Улсын төрийн албаны хүний нөөцийн удирдлагын тогтолцоог сайжруулах арга зам”
-
“Төрийн албаны гүйцэтгэлийн удирдлагын тогтолцоог бэхжүүлэх нь”
-
“Төрийн албаны удирдах албан хаагчийн ур чадварыг бэхжүүлэх нь” гэсэн зөвлөх үйлчилгээний үр дүн багтжээ.
Эдгээр тайлангийн хүрээнд БНСУ-ын төрийн албаны шинэчлэлийн туршлагыг судалж, Монгол Улсын нөхцөлд тохируулан нэвтрүүлэх боломжийг хэлэлцсэн байна. Ингэснээр төрийн албаны бүтээмж, иргэдэд хүргэх үйлчилгээний чанар, үр дүн сайжрах суурийг тавих юм.
Арга хэмжээнд УИХ-ын зарим гишүүн, ЗГХЭГ-ын дэд дарга Б.Батцэцэг, БНСУ-аас Монгол Улсад суугаа Онц бөгөөд Бүрэн эрхт Элчин сайд Чой Жинь Вон болон Төрийн албаны зөвлөл, салбарын яамд, агентлагийн 200 гаруй албан хаагч оролцож, төрийн албаны шинэтгэлийн талаар санал бодлоо солилцов.
Эх сурвалж: Засгийн газрын Хэрэг эрхлэх газар.
