“Эмчээ Сонсъё” уулзалтаар 800 орчим эмчтэй шууд уулзалт хийлээ

Эрүүл мэндийн сайд Т.Мөнхсайхан “Эмчээ Сонсъё” өглөөний уулзалтыг зургаан өдөр дараалан зохион байгуулж, эрүүл мэндийн салбарын эмч нарын санал бодлыг сонсож, тулгамдаж буй асуудалд шийдвэр гаргах түвшний хариулт өглөө. Танхим болон цахим хэлбэрээр явагдсан тус уулзалтад нийт 800 орчим эмч оролцсон нь эмч нартай шууд харилцах, салбарын бодлого шийдвэрийн хэрэгжилтийг бодитоор дүгнэх чухал боломж боллоо.

Эмч нарын зүгээс уулзалтын үеэр илэрхийлсэн гол асуудлууд дараах байв:

• Эрүүл мэндийн даатгалын сангийн санхүүжилтийн хүрэлцээ, хугацаа

• Эмч нарын цалингийн хэмжээ, ажлын ачаалал

• Ажлын байран дээр үйлчлүүлэгчийн дарамт, нэр хүндэд нь халдах байдал

• Иргэдийн зүгээс зураг, бичлэг хийж нийгмийн сүлжээнд нийтлэх нь нэр төрд халдаж буй байдал

Эрүүл мэндийн сайд Т.Мөнхсайхан эдгээр асуудалд хариулт өгөхдөө дараах байр суурийг илэрхийллээ:

• Эмч нарын цалин сүүлийн дөрвөн жилд тодорхой хувиар нэмэгдсэн, цаашид ч нэмэгдүүлэх бодлого үргэлжилнэ.

• ЭМДС-ийн өрийг барагдуулж, үүсээд буй санхүүгийн асуудлыг бүрэн шийдвэрлэх чиглэлд ажиллаж байна.

• Эрүүл мэндийн салбарын эрх зүйн орчныг сайжруулах болон Эрүүл мэндийн даатгалын сангийн тухай хууль зэрэг гол хуулиудыг 2025 оны намрын чуулганаар өргөн барихаар төлөвлөжээ.

• Эмч эмнэлгийн ажилтнуудын нэр төрд халдах, биед нь халдах зэрэг үйлдлийг хуулиар зохицуулж, тэдний эрх зүйн хамгаалалтыг нэмэгдүүлэх чиглэлд ажиллана.

• Цаашид эмч, эмнэлгийн мэргэжилтнүүдийн нийгмийн асуудал, боловсрол, мэргэшлийн ахиц зэрэгт анхаарсан бодлогыг хэрэгжүүлнэ гэдгийг онцлон тэмдэглэв.

“Эмчээ Сонсъё” уулзалт нь эрүүл мэндийн салбарт ажиллаж буй мэргэжилтнүүдийн дуу хоолойг бодлогын түвшинд хүргэх, харилцан ойлголцлыг сайжруулах чухал алхам болж байгааг оролцогчид илэрхийлжээ.

Эх сурвалж: Эрүүл мэндийн яам.