Засгийн газрын Хэрэг эрхлэх газар болон БНСУ-ын Олон улсын хамтын ажиллагааны байгууллага (КОЙКА)-тай хамтран хэрэгжүүлж буй “Монгол Улсын Төрийн албаны гүйцэтгэлийн удирдлагын тогтолцоог бэхжүүлэх нь” төсөл 2023-2025 онд хэрэгжиж байна. Энэ төслийн хүрээнд төрийн албаны шинэтгэлийг дэмжих, гүйцэтгэлийн удирдлагын тогтолцоог боловсронгуй болгох, төрийн албан хаагчдын чадавхыг дээшлүүлэх зорилт тавигджээ.

2025 оны дөрөвдүгээр сарын 4-ний өдөр “Чингис хааны музей”-д болсон хэлэлцүүлгээр төслийн хүрээнд боловсруулсан дараах зөвлөмж, судалгааг олон нийтэд танилцуулж, хэлэлцлээ. Үүнд:

• “Монгол Улсын төрийн албаны хүний нөөцийн удирдлагын тогтолцоог сайжруулах арга зам”

• “Төрийн албаны гүйцэтгэлийн удирдлагын тогтолцоог бэхжүүлэх нь”

• “Төрийн албаны удирдах албан хаагчийн ур чадварыг бэхжүүлэх нь”

Эдгээр тайланд БНСУ-ын төрийн албаны шинэчлэлийн туршлага, арга барилыг судалж, Монгол Улсын төрийн захиргааны онцлогт нийцүүлэн, шинэчлэлийн үйл ажиллагаанд хэрэгжүүлэх боломжит арга замыг тусгасан байна. Судалгааны үр дүнгээр төрийн албаны бүтээмжийг дээшлүүлэх, удирдах албан тушаалтны манлайлал, гүйцэтгэлийн үнэлгээний тогтолцоог сайжруулах шаардлагатайг онцолжээ.

Хэлэлцүүлэгт УИХ-ын гишүүд, ЗГХЭГ-ын Дэд дарга Б.Батцэцэг, БНСУ-аас Монгол Улсад суугаа Онц бөгөөд Бүрэн эрхт Элчин сайд Чой Жинь Вон, Төрийн албаны зөвлөл, салбарын яамд, агентлагийн нийт 200 гаруй албан хаагч оролцсон юм. Энэ нь төрийн албыг илүү хариуцлагатай, иргэдэд үр өгөөжтэй болгох чиглэлд хийж буй алхам гэдгийг оролцогчид тэмдэглэв.

Эх сурвалж: Засгийн газрын Хэрэг эрхлэх газар.