Гэр бүл, хөдөлмөр, нийгмийн хамгааллын яамны Төрийн нарийн бичгийн дарга Л.Мөнхзул 2025 оны 4 дүгээр сарын 4-нд Олон Улсын эрхзүйн хөгжлийн байгууллагын суурин төлөөлөгч Чарлыз Болландтай уулзлаа. Тус байгууллага нь 2019-2023 онд Монгол Улсад жендэрт суурилсан хүчирхийлэлтэй тэмцэх үйл ажиллагааг дэмжих төсөл хэрэгжүүлсэн бөгөөд одоо төслийн хоёрдугаар үе шатыг Канад Улсын Засгийн газрын санхүүжилтээр хэрэгжүүлэхээр болжээ.

Шинэ шатны төслийн хүрээнд дараах ажлуудыг хийхээр төлөвлөсөн байна:

• Гэр бүлийн хүчирхийлэлтэй тэмцэх тогтолцоог бэхжүүлэх

• Салбар дундын хамтын ажиллагааг сайжруулах

• Хууль сахиулах, шүүх эрх мэдэл, хариу үзүүлэгчийн ур чадварыг нэмэгдүүлэх

• Хохирогч төвтэй хандлагыг төлөвшүүлэх

Мөн алслагдсан орон нутагт амьдарч буй эмэгтэйчүүдийн нөхцөл байдлыг судалж, холбогдох хууль, эрхзүйн байгууллагын ажилтнуудыг чадавхжуулах, олон нийтийн ойлголт, мэдээлэл, хандлагыг сайжруулах чиглэлд ажиллана.

Сүүлийн 10 жилд гэр бүлийн хүчирхийлэлтэй тэмцэх чиглэлээр тодорхой ахиц дэвшил гарсан ч салбар дундын уялдаа холбоо цаашид ч улам бүр чухал хэвээр байна. Энэ хүрээнд 2025 оны 3 дугаар сарын 1-нээс улсын хэмжээнд ажиллаж эхэлсэн 700 гаруй хүүхэд, гэр бүлийн нийгмийн ажилтны чадавхыг сайжруулах, тэдэнд шаардлагатай зөвлөмж, сургалт, дэмжлэг үзүүлэх талаар хоёр тал санал нэгдэж, хамтран ажиллахаар тохиролцсон юм.

Төслийг Хууль зүй, дотоод хэргийн яам, Гэр бүл, хөдөлмөр, нийгмийн хамгааллын яам, Гэмт хэргээс сэргийлэх үндэсний зөвлөл, Жендэрийн үндэсний хороо зэрэг төрийн байгууллагууд хамтран хэрэгжүүлнэ.

Эх сурвалж: Гэр бүл, хөдөлмөр, нийгмийн хамгааллын яам.