Бүгд Найрамдах Солонгос Улсын Гал түймэртэй тэмцэх ерөнхий газрын Гал түймэртэй тэмцэх тоног төхөөрөмжийн хэлтсийн даргын үүргийг гүйцэтгэгч Жон Гван Бук тэргүүтэй төлөөлөгчид Монгол Улсын Онцгой байдлын ерөнхий газарт энэ сарын 1-3-ны өдрүүдэд айлчлал хийлээ. Энэхүү айлчлал нь “Гамшгийн хариу арга хэмжээ ба яаралтай тусламжийн чадавхыг бэхжүүлэх дэлхийн сургалтын хөтөлбөр”-ийн хүрээнд урьдчилсан судалгаа хийх зорилготой байв.
Айлчлалын үеэр БНСУ-ын төлөөлөгчид ОБЕГ-ын Гал түймэртэй тэмцэх газрын дарга, хурандаа Ц.Нямбаяртай уулзаж, хоёр байгууллагын ирээдүйн хамтын ажиллагаа, гамшгийн эрсдэлийн менежмент, гал түймрийн аюулгүй байдлын чиглэлээр туршлага солилцох, алба хаагчдыг чадавхжуулах чиглэлд хамтарсан сургалтууд зохион байгуулах талаар тохиролцоонд хүрсэн байна.
Түүнчлэн төлөөлөгчид ОБЕГ-ын харьяа 116 дугаар анги, Нийслэлийн Онцгой байдлын газрын Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар анги, мөн Төв аймгийн Онцгой байдлын газрын үйл ажиллагаатай танилцаж, тоног төхөөрөмжийн байдал, сургалтын нөхцөл, өдөр тутмын үйл ажиллагааг газар дээр нь үзэж, дүн шинжилгээ хийжээ.
Энэхүү хамтын ажиллагаа нь Монгол, БНСУ-ын гамшгийн эрсдэлийг бууруулах, гамшгийн үед үзүүлэх хариу арга хэмжээний чадавхыг нэмэгдүүлэхэд чиглэсэн бодит алхам болж байна гэж ОБЕГ мэдээлэв.
Эх сурвалж: Онцгой байдлын ерөнхий газар
