Хууль зүй, дотоод хэргийн сайд О.Алтангэрэл 2025 оны 4 дүгээр сарын 3-ны өглөө Хууль зүйн туслалцааны төвийн улсын өмгөөлөгчидтэй уулзалт хийж, тэдний үйл ажиллагааг дэмжих, хөгжүүлэх чиглэлээр авч хэрэгжүүлж буй бодлого, шийдвэрүүдээ танилцууллаа.

Хууль зүйн туслалцааны төв нь 21 аймаг, 8 дүүрэг, сум дундын шүүхтэй 5 суманд нийт 34 салбарт 59 өмгөөлөгчтэй ажиллаж, төлбөрийн чадваргүй болон анхан шатны хууль зүйн зөвлөгөө шаардлагатай иргэдэд үйлчилгээ үзүүлдэг. 2024 онд улсын өмгөөлөгчид нийт 2404 хэрэгт оролцож, 11,498 иргэнд зөвлөгөө өгч, 3153 баримт бичиг боловсруулжээ.

Уулзалтын үеэр сайд О.Алтангэрэл:

• Хиймэл оюун ухаанд суурилсан хууль зүйн зөвлөгөөний цахим платформ үүсгэхээр ажиллаж байгааг,

• Улсын өмгөөлөгчдийн цалин хангамжийг нэмэгдүүлсэн,

• УИХ-д хэлэлцэгдэж буй Эрүүгийн хэрэг хянан шийдвэрлэх тухай хуулийн төсөлд туссан онцлох өөрчлөлтүүдийн талаар дэлгэрэнгүй мэдээлэл өглөө.

Тэрбээр “Хөгжингүй орнуудын жишгээс харахад хамгийн чадварлаг хуульчид улсын өмгөөлөгчдөөс төрдөг. Тэд нийгмийн эмзэг хэсэгт хүрч ажилладаг учраас зөвхөн ур чадвараар бус, хүнлэг сэтгэлээр илүү өсөж төлөвшдөг. Тиймээс тэдний үнэ цэн, оролцоог манай улс онцгойлон дэмжих ёстой” гэж онцлов.

Уулзалтад ХЗДХЯ болон тус төвийн удирдлагууд оролцож, өмгөөлөгчдийн санал хүсэлтийг сонсч, цаашдын хамтын ажиллагааны талаар харилцан ярилцсан байна.

Эх сурвалж: ХЗДХЯ