Эрүүл мэндийн яамны Төрийн нарийн бичгийн дарга Д.Очирбат тэргүүтэй төлөөлөгчид 2025 оны 4 дүгээр сарын 3-4-ний өдрүүдэд Бүгд Найрамдах Филиппин Улсын Манила хотноо зохион байгуулагдаж буй Өвчтөний аюулгүй байдлын асуудлаарх дэлхийн сайд нарын 7 дугаар дээд хэмжээний уулзалтад оролцож байна.
Азийн хөгжлийн банкны бүсийн төвд болж буй уг дээд хэмжээний уулзалтад дэлхийн 30 гаруй орны төлөөлөгч оролцож байгаа бөгөөд улс орнууд өвчтөний аюулгүй байдлын талаар харилцан туршлага солилцож, цаашид энэ чиглэлийн хамтын ажиллагааг бэхжүүлэх талаар хэлэлцэж байна. Уулзалтаас “Мандалуёнгын тунхаг”-ийг батлах бөгөөд тус баримт бичиг нь дараах гол зорилгыг дэвшүүлж байна:
-
Үйлчлүүлэгч төвтэй эрүүл мэндийн тусламжийг дэмжих
-
Өвчтөний аюулгүй байдлыг эрхэмлэсэн тогтолцоог улс орнууд бэхжүүлэх
-
Эрүүл мэндийн салбар дахь удирдлагын манлайлал, чадавхийг нэмэгдүүлэх
Тунхаг нь бүх улс оронд өвчтөний аюулгүй байдалд чиглэсэн үр нөлөөтэй бодлого хэрэгжүүлэхийг уриалж байгаа бөгөөд Монгол Улс энэ чиглэлээр олон улсын хамтын ажиллагааг эрчимжүүлэн ажиллах бодолтой байна.
Эх сурвалж: Эрүүл мэндийн яам.
