АНУ-ын Ерөнхийлөгч Дональд Трамп бүх импортын бараанд татвар ногдуулах шийдвэр гаргасны дараа Хятадын Худалдааны яам хатуу мэдэгдэл хийж, тус шийдвэр нь хууль ёсны эрх ашгийг нь зөрчиж байгааг онцлон, хариу арга хэмжээ авахаа мэдэгдлээ.

АНУ-ын зүгээс Хятадын бараанд 34 хувийн гаалийн татвар оноохоор болсон нь худалдааны түншийн зарчмыг зөрчиж, "нэг талыг барьсан сүрдүүлгийн тод жишээ" боллоо гэж Хятадын тал үзэж байна. Мөн “энэ төрлийн арга хэмжээ нь зөвхөн АНУ-ын төдийгүй дэлхийн эдийн засагт хор хөнөөлтэй, үйлдвэрлэл, нийлүүлэлтийн сүлжээг тогтворгүй болгож байна” хэмээн мэдэгдэлд дурджээ.

Хятадын Худалдааны яам Трампын хэрэгжүүлж буй протекционист бодлого нь АНУ-ын дотоодын асуудлыг шийдэхээс илүүтэй мухардалд хүргэх зам болохыг анхааруулж, олон улсын худалдааны тогтолцоог хүнд байдалд оруулж байгааг тэмдэглэв. Иймд АНУ-ыг татварын нэг талт арга хэмжээгээ яаралтай цуцалж, тэгш эрхтэй, харилцан ашигтай хэлэлцээг сэргээхийг уриалав.

Харин АНУ-ын зүгээс Трамп өчигдөр мэдэгдэл хийж, хилийн чанадаас нийлүүлэгдэж буй бүх бараанд 10 хувийн доод татвар ногдуулах бөгөөд улс орнуудаар ангилсан тарифын бодлого хэрэгжүүлж байгааг тодотгожээ. Энэхүү шийдвэр дөрөвдүгээр сарын 9-нөөс хэрэгжиж эхэлнэ.

Эх сурвалж: TASS