УИХ-ын Нийгмийн бодлогын байнгын хорооны хуралдаанаар Донорын тухай хуулийн хэрэгжилтийн талаар Эрүүл мэндийн сайд Т.Мөнхсайхан танилцууллаа. 2000 онд батлагдаж, 2018 онд шинэчлэгдсэн уг хууль нь хүний эрүүл мэнд, амь насыг аврах зорилгоор сайн дураар цус, эс, эд, эрхтэн хандивлах харилцааг зохицуулдаг.

Эрхтэн шилжүүлэн суулгах эмчилгээ манай улсад 1996 оноос хойш 824 удаа хийгдсэнээс:

• 500 хүнд элэг,

• 400 хүнд бөөр,

• 33 хүнд ясны чөмөг,

• 170 хүнд шөрмөс шилжүүлэн суулгасан байна.

2023 оны эцсийн байдлаар эрхтэн шилжүүлэх шаардлагатай 1094 иргэн бүртгэгдсэнээс 182 нь элэг, 683 нь бөөр шилжүүлэн суулгуулах шаардлагатай байна.

Мөн:

• 21 эрүүл мэндийн байгууллагад тархины үхлийг тодорхойлох баг ажиллаж,

• 278 боломжит донорыг илрүүлж,

• 37 гэр бүлээс зөвшөөрөл авч,

• 45 хүнд бөөр, 27 хүнд элэг шилжүүлсэн.

Цусны донорын тухайд, 1994 оноос авлагагүй донорын тогтолцоонд шилжсэн бөгөөд 2024 оны байдлаар 170 мянга гаруй донор бүртгэлтэй байна. Цусны нөөц:

• 2014 онд 26,097 нэгж байсан бол

• 2024 онд 45,577 нэгж болж, 1.7 дахин өсжээ.

Сайд мэдээлэлдээ эрхтэн шилжүүлэн суулгах болон цусны донорын асуудлыг тус тусад нь хуульчилж, илүү оновчтой зохицуулах шаардлагатайг онцолсон бөгөөд холбогдох хуулийн төслүүдийг өргөн барьжээ.

Эх сурвалж: УИХ-ын Хэвлэл мэдээллийн газар.