Булган аймгийн Засаг дарга Д.Пүрэв-Очир Онцгой байдлын ерөнхий газрын дарга, хошууч генерал Г.Ариунбуяныг хүлээн авч уулзлаа. Уулзалтын үеэр аймгийн Засаг дарга өвөлжилт харьцангуй өнтэй, хаваржилт таатай эхэлж буйг онцлон тэмдэглэж, цаг үеийн нөхцөл байдлын талаар танилцуулсан байна. Мөн Онцгой байдлын ерөнхий газар аймагт онцгойлон анхаарч ажиллаж байгаад талархал илэрхийлжээ.
Уулзалтын дараа Булган аймгийн Онцгой комисс бүрэн бүрэлдэхүүнээрээ хуралдаж, аймгийн хэмжээнд авч хэрэгжүүлж буй гамшгаас хамгаалах арга хэмжээ, онцгой нөхцөл байдал үүсэхээс урьдчилан сэргийлэх бэлтгэл ажлын явцыг танилцуулсан байна.
Онцгой байдлын ерөнхий газрын дарга, хошууч генерал Г.Ариунбуян байгууллага хоорондын уялдаа холбоо, хамтын ажиллагаа сайжирч байгааг үнэлээд, гамшгийн голомтод хариу арга хэмжээг үр дүнтэй зохион байгуулах тал дээр аймаг сайн ажиллаж байгааг дүгнэжээ.
Түүнчлэн, цаг үеийн нөхцөл байдалтай холбоотойгоор 16 чиглэл бүхий үүрэг даалгавар өгсөн байна.
Эх сурвалж: ОБЕГ
