УИХ-ын Аюулгүй байдал, гадаад бодлогын байнгын хорооны хуралдаанаар “Транс-Азийн төмөр замын сүлжээний тухай Засгийн газар хоорондын хэлэлцээр”-ийн нэмэлт өөрчлөлтийг соёрхон батлах тухай хуулийн төслийг хэлэлцэн, нэгдсэн чуулганаар хэлэлцүүлэхийг дэмжлээ. Төслийн талаар Зам, тээврийн сайд Б.Дэлгэрсайхан танилцуулсан бөгөөд уг нэмэлт нь төмөр замын тээврийн цахим мэдээлэл солилцооны шинэ зарчмуудыг тусгасан гуравдугаар хавсралтыг хэлэлцээрт нэмж баталсан асуудал юм.

Энэхүү цахим солилцооны зорилго нь төмөр замууд хооронд болон төмөр зам, хилийн хяналтын байгууллагуудын хооронд харилцан мэдээлэл солилцох суурь зохицуулалтыг бүрдүүлэхэд чиглэж байгаа юм. Монгол Улс нэмэлт өөрчлөлтөд нэгдэн орсноор:

• Төмөр замын тээврийн өрсөлдөх чадварыг нэмэгдүүлэх

• Хил дамнасан цаасгүй худалдааг хөнгөвчлөх

• Цахим бүртгэлийн нэгдсэн тогтолцоонд нэвтрэх

• Гаалийн хяналтын давхардлыг арилгах

• Татвар зугтаах боломжийг хязгаарлах боломж бүрдэнэ гэж Б.Дэлгэрсайхан онцоллоо.

Түүнчлэн БНХАУ-аас ирж буй бараа бүтээгдэхүүнд хоёр улсын гаалийн бүрдүүлэлт тус тусдаа хийдгээс болж үүсдэг чирэгдлийг цэгцлэх алхам болохыг тайлбарлав. Нэг улсын гаалийн бүрдүүлэлт нөгөө улсын бүртгэлд шууд орж ирэх замаар хяналтын давхардал арилж, хугацаа хэмнэхээс гадна эдийн засгийн өгөөжийг нэмэгдүүлэх суурь бүрдэх юм.

Төслийг чуулганы нэгдсэн хуралдаанаар үргэлжлүүлэн хэлэлцэхийг Байнгын хорооны гишүүдийн олонх дэмжсэн байна.

Эх сурвалж: УИХ-ын Хэвлэл мэдээллийн газар