Улаанбаатар хотын төр, захиргааны байгууллагын албан хаагчдыг “ФИДИК” гэрээний онол, хэрэглээний талаар мэдлэгтэй болгох цуврал сургалтад хамрууллаа. Энэ хүрээнд “ФИДИК” гэрээний төрөл, онцлог, Монгол Улсын хууль тогтоомжтой нийцэх байдал зэрэг өргөн хүрээний мэдээллийг өгч, 24 мега төслийг энэхүү олон улсын стандартын дагуу хэрэгжүүлэх бэлтгэлийг хангаж байна.

“ФИДИК” гэрээ нь анх 1957 онд боловсруулагдаж, өнөөдөр 102 улс оронд мөрдөгдөж буй дэлхийн инженерүүдийн жишиг стандарт юм. Энэ гэрээний гол онцлог нь төсөл хэрэгжүүлэх талуудын эрх, үүргийг тэнцвэртэй хуваарилж, цаг хугацаа, санхүүгийн эрсдэлээс сэргийлэх зохицуулалт бүхий загвартай байдаг.

Нийслэлийн Засаг даргын Эдийн засгийн хөгжил, дэд бүтцийн асуудал хариуцсан орлогч Т.Даваадалай “Төсөл хөтөлбөрүүдийг олон улсын хэмжээнд хүлээн зөвшөөрөгдсөн загвараар хэрэгжүүлснээр бүтээн байгуулалт хугацаандаа, эрсдэлгүй хэрэгжих нөхцөл бүрдэнэ” гэж онцоллоо.

Сургалтад “ФИДИК”-ийн 2023 оны шилдэг сургагч багш, зөвлөх инженер Маркус Тиил болон “Батбаяр энд Партнэрс” ХХН-ийн хуульч Г.Батбаяр нар оролцож, гэрээний практик хэрэглээ, санал зөрөлдөөн үүсэх үед “ФИДИК” стандартын дагуу хөндлөнгийн шинжээчээр асуудлыг шийдвэрлүүлэх боломжийн талаар тайлбарлав.

“ФИДИК” гэрээг төслийн онцлогоос шалтгаалан төрөлжүүлдэг. Тухайлбал:

• Улаан, шар ном: Зам, барилгын төслүүдэд ашиглагддаг.

• Мөнгөлөг ном: Түлхүүр гардуулах нөхцөлтэй барилгын төслүүдэд.

• Цагаан ном: Зөвлөх үйлчилгээний гэрээнд ашиглагддаг.

Энэхүү сургалт нь нийслэлд хэрэгжих бүтээн байгуулалтын төслүүдийг олон улсын түвшинд, үр ашигтай, хариуцлагатай хэрэгжүүлэх чадавхыг төрийн албан хаагчдад олгох зорилготой юм.

Эх сурвалж: НЗДТГ