УИХ дахь Монгол Ардын Намын бүлэг өчигдрийн хуралдаанаараа Хууль тогтоомжийн тухай хууль болон Зөвшөөрлийн тухай хуульд нэмэлт, өөрчлөлт оруулах тухай хуулийн төслийг хэлэлцэж, үзэл баримтлалын хүрээнд дэмжих шийдвэр гаргалаа.
Хууль тогтоомжийн тухай хуульд оруулах нэмэлт, өөрчлөлтөөр:
-
Хууль санаачлагчдын хүрээ хязгаарыг нарийвчлах
-
Хуульд хүний эрхэд үзүүлэх нөлөөллийг үнэлэх
-
Олон нийтийн оролцоог хангах зэрэг шинэ зохицуулалтууд тусгагдсан бөгөөд ингэснээр батлагдах хуулийн чанар сайжрах ач холбогдолтой гэж үзсэн байна.
Мөн цахим мөрийтэй тоглоом, хууль бус мөнгө угаах, оффшор гүйлгээг зогсоох шаардлагатайг онцлон тэмдэглэжээ. Жишээлбэл, Монгол Улсад үйл ажиллагаа эрхлэх зөвшөөрөлгүй 1XBET компанийн агентуудаар дамжуулан 2024 онд 500 сая ам.доллар, 2025 он гарснаар 87 сая ам.доллар гадагш гарсан нь анхаарал татаж байна.
Цахим мөрийтэй тоглоомд донтох эмгэг, иргэдийн санхүүгийн хохирол жилээс жилд нэмэгдэж байгаа тул энэ асуудлыг хууль эрх зүйн хүрээнд яаралтай шийдвэрлэх шаардлагатай гэж МАН-ын бүлэг үзсэн юм.
Эх сурвалж: МАН-ын бүлгийн мэдээлэл.
