Нийслэлийн удирдах ажилтнуудын шуурхай зөвлөгөөний үеэр Нийслэлийн Засаг дарга бөгөөд Улаанбаатар хотын захирагч Х.Нямбаатар хүүхдийн төлөө хийж буй ажилд хамтарч ажиллахгүй байгаа аж ахуйн нэгжүүдтэй холбоотой зөвшөөрөл, бичиг цаасны ажлыг зогсооно гэдгийг онцлон мэдэгдлээ.
Тэрбээр, “Хотын хэмжээнд хүн амын нягтшил ихтэй хэдий ч сургууль, цэцэрлэгийн хүртээмж тааруу байршлууд бий. Тухайлбал, Баянзүрх дүүргийн 6 дугаар хороо ганцхан ерөнхий боловсролын сургуультай, харин 21 дүгээр сургуулийн ачаалал дээд хэмжээнд хүрсэн. Хорооны оршин суугчид, эцэг эхчүүд өөрсдөө санаачилга гарган ‘Наран трейд’ компанийн эзэмшлийн цэцэрлэгийн зориулалттай хуучин барилгыг бага сургуулийн зориулалтаар ашиглах хүсэлт тавьсан. Нийслэлээс уг барилгыг худалдан авах санал тавьсан ч тус компани олон жил ашиглаагүй барилгаа ‘заал болгоно’ гэж хав дараад сууж байна. Хэрэв хүүхдийн төлөө ажилд хамтрахгүй бол тус компанийн бичиг цаасны ажлыг зогсооно” хэмээн мэдэгдлээ.
Энэхүү мэдэгдэл нь сургууль, цэцэрлэгийн хүртээмжийг нэмэгдүүлэхэд иргэн, аж ахуйн нэгжийн хамтын оролцоо чухал болохыг сануулж буй алхам юм.
Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс.
