Монгол Улсаас БНСУ-д суугаа Элчин сайд С.Сүхболд 2025 оны гуравдугаар сарын 25-нд тус улсын Гадаад хэргийн яамны Консул, аюулгүй байдлын захирал Юн Чусоктой уулзаж, хоёр орны иргэдийн зорчих нөхцөл болон визийн бодлогын хэрэгжилтийн талаар санал солилцлоо.

Элчин сайд С.Сүхболд уулзалтын үеэр дараах асуудлуудыг онцлон тавьжээ:

• Монгол иргэдийн визийн материалыг E-Mongolia системийн цахим лавлагаагаар баталгаажуулан хүлээн авах

• Солонгосын хилээр нэвтрэх үед визтэй иргэдийг хил дээрээс буцаахгүй байх

• Хилийн шалган нэвтрүүлэх явцад иргэдийн гар утас, хувийн мэдээлэл шалгах явдлыг зогсоох

• Өмнөд Солонгост эмчилгээнд ирж буй иргэдийг визийн шаардлагаас чөлөөлөх саналыг ажил хэрэг болгох

Юн Чусок элчин сайдын тавьсан асуудлуудад дараах байдлаар хариу өгсөн байна:

• Виз олгохдоо хүчин төгөлдөр баримт бичиг шаардах хууль зүйн зохицуулалт байгаа тул гадаад паспортыг цахимаар шалгах боломжийг Хууль зүйн яамтай зөвлөлдөн судалж байна

• Визийн ажилтны орон тоог нэмэгдүүлж, олголтын хугацааг богиносгож эхэлсэн

• Хүлээн зөвшөөрөгдсөн эмнэлгээс нотолгоо авсан эмчилгээний визийг цахимаар мэдүүлэх боломж нээгдэж, санхүүгийн баталгаа шаардахгүй байх шинэ зохицуулалт хийж буйг дурдав

• Цаашид хоёр тал хамтран ажиллахад бэлэн байгааг онцолжээ

Уулзалт нь хоёр орны иргэдийн зорчих хөдөлгөөнийг хөнгөвчлөх, визийн зохицуулалтыг илүү уян хатан, хүртээмжтэй болгох чухал алхам байв.

Эх сурвалж: ВВС