2025 оны гуравдугаар сарын 25-ны өдөр Арилжааны болон дампуурлын харилцааг зохицуулсан хууль, эрх зүйн орчныг боловсронгуй болгох асуудлыг судалж, санал дүгнэлт гаргах, холбогдох хуулийн төсөл боловсруулах үүрэг бүхий ажлын хэсгийн хуралдаан боллоо. Хуралдаанд Хууль зүй, дотоод хэргийн яам, Монгол Улсын Их Сургуулийн Хууль зүйн сургуулийн судлаач, багш нар оролцож, Арилжааны хуулийн болон Төлбөрийн чадваргүйдлийн тухай хуулийн төслүүдийг танилцууллаа.

Арилжааны хуулийн төсөл нь бизнес эрхлэгчдийн хоорондын итгэлцлийг нэмэгдүүлж, арилжааны харилцааг илүү нарийвчилсан зохицуулалттай болгохоор зорьжээ. Төслийн хүрээнд:

• Арилжаа эрхлэгчдийг Монголын Үндэсний худалдаа, аж үйлдвэрийн танхимд бүртгэх

• Арилжааны гэрээний төрөл бүрийг (мөнгөн зээл, санхүүгийн түрээс, франчайз гэх мэт) хуульчлан тодорхойлох

• Арга хэмжээ, гэрээний биелэлттэй холбоотой маргааныг уламжлалт заншилд тулгуурлан түргэн шийдвэрлэх нөхцөл бүрдүүлэх

• Арилжаа эрхлэгчийн нэр, төлөөлөгчийн эрх зэрэг нарийвчилсан асуудлыг хуульчлах

Эдгээр зохицуулалтууд нь хувийн эрх зүйн системийн нэгдмэл байдлыг хангаж, зах зээлийн тогтвортой орчныг бүрдүүлэх ач холбогдолтой гэж үзэж байна.

Төлбөрийн чадваргүйдлийн тухай хуулийн төсөл нь одоогийн Дампуурлын тухай хуулийг шинэчлэн найруулах хэлбэрээр боловсруулагдаж байна. Төсөлд:

• Төлбөрийн чадваргүйдлийг бүртгэх, олон нийтэд мэдээлэх

• Дампуурлын процесс, нотлох баримтын шаардлагыг нарийвчлах

• Гүйцэтгэгчийн эрх зүйн байдал, дампуурлын шүүхийн хяналт, хөрөнгө хуваарилалт, дахин хөрөнгөжүүлэх төлөвлөгөө зэрэг зохицуулалтыг шинээр оруулах

• Олон улсын эрх зүйн туршлага, хандлагыг тусгах

Эдгээр шинэчлэл нь компаниудын санхүүгийн эрсдлийг ил тод, хяналттай удирдах, хөрөнгө оруулагч, харилцагчдын итгэлийг нэмэгдүүлэхэд чиглэж буй юм.

УИХ-ын гишүүн С.Цэнгүүн хуулийн төслүүдийг дэмжиж буйгаа илэрхийлж, Ардчилсан Намын хуульчдын бүлгийг оролцуулан шинжилгээ, санал дүгнэлт гаргаж дараагийн хуралдаанд танилцуулахаа мэдэгдэв. Харин УИХ-ын гишүүн М.Мандхай хуулийн төслүүдийг төр, хувийн хэвшлийн түншлэл болон монополыг хязгаарлах зохицуулалттай уялдуулах, дампуурлаас урьдчилан сэргийлэх асуудлыг тодорхой тусгах хэрэгтэйг санууллаа.

Эх сурвалж: Улсын Их Хурлын Хэвлэл мэдээллийн газар.