2025 оны гуравдугаар сарын 25-ны өдөр Улсын Их Хурлын Төрийн байгуулалт болон Эдийн засгийн байнгын хорооны хамтарсан хуралдаан болж, Монгол Улсыг 2021–2025 онд хөгжүүлэх таван жилийн үндсэн чиглэл, Засгийн газрын 2024–2028 оны үйл ажиллагааны хөтөлбөрийн 2024 оны гүйцэтгэлийн тайлан, Монгол Улсын хөгжлийн 2024 оны төлөвлөгөөний гүйцэтгэлийн тайланг хэлэлцлээ. Энэ асуудлыг 2025 оны гуравдугаар сарын 18-нд хэлэлцэж эхэлсэн ч УИХ дахь АН-ын бүлэг завсарлага авч, хэлэлцүүлэг түр хойшлогдсон байсан юм.
Хэлэлцүүлгийн үеэр УИХ-ын гишүүн Г.Лувсанжамц төлөвлөгөө, хөтөлбөрийн шалгуур үзүүлэлтүүд нь тодорхой бус, хэмжих боломжгүй байгааг шүүмжлээд, 100 хувийн биелэлтээр дүгнэсэн арга хэмжээ бодит байдлаас зөрж байгааг онцлов. Тэрбээр цахилгаан халаагуур хэрэглэдэг айлуудын зардал нэмэгдсэн, төрийн өмчит компаниудын засаглал үр ашиггүй хэвээр байгааг дурдан, авлигыг 100 хувь бууруулсан гэх үнэлгээ нь бодит байдалд нийцэхгүй гэж мэдэгдлээ.
Засгийн газрын хэрэг эрхлэх газрын дарга Н.Учрал хариу тайлбар хийхдээ, тайланд туссан “100 хувь биелэлт” гэдэг нь тухайн оны хүрээнд төлөвлөсөн шат дараалсан ажлын гүйцэтгэлийг хэлж буй болохоос ажлын эцсийн үр дүнг илэрхийлдэггүй хэмээн тодотгов. Мөн Хяналт хэрэгжүүлэх газар эцсийн үнэлгээг хийж буйг тайлбарлалаа.
Эрчим хүчний яамны Төрийн нарийн бичгийн дарга Н.Тавинбэх “эрчим хүчний эдийн засгийн үр ашгийг нэмэгдүүлэх” зорилтыг хэрэгжүүлэх хүрээнд тарифын индексжүүлэлт хийсэн тул 100 хувийн биелэлтээр дүгнэсэн гэж хариулав. Харин олон гишүүн энэ нь хэрэглэгчдэд нэмэлт ачаалал болж байгааг сануулав.
Хяналт, үнэлгээний Үндэсний хорооны дарга Э.Одбаяр бодлого, төлөвлөлт, гүйцэтгэлийн хяналтыг уялдуулах зорилгоор хяналт-шинжилгээ, үнэлгээний цогц системийг нэвтрүүлэхээр ажиллаж буйг танилцуулсан бол Байнгын хорооны дарга Ж.Бат-Эрдэнэ тайлангийн үнэлгээ бодит бус, гишүүдийн асуултад тодорхой хариу өгөөгүй байгааг шүүмжилж, шаардлагатай бол холбогдох журам, хуулийн өөрчлөлт боловсруулж танилцуулахыг үүрэг болголоо.
Эцэст нь, Монгол Улсыг 2021–2025 онд хөгжүүлэх үндсэн чиглэл, Засгийн газрын 2024–2028 оны үйл ажиллагааны хөтөлбөр, хөгжлийн 2024 оны төлөвлөгөөний гүйцэтгэлийн тайланг хэлэлцсэн талаарх санал, дүгнэлтийг УИХ-ын чуулганы нэгдсэн хуралдаанд танилцуулахаар тогтов.
Эх сурвалж: Улсын Их Хурлын Хэвлэл мэдээллийн газар.
