Төрийн аудитын байгууллагаас Монгол Улсыг 2021-2025 онд хөгжүүлэх таван жилийн үндсэн чиглэлийн хэрэгжилтэд хийсэн гүйцэтгэлийн аудитын тайланг Улсын Их Хурлын Төрийн байгуулалт, Эдийн засгийн байнгын хорооны хамтарсан хуралдаанд танилцууллаа. Хуралдаан энэ сарын 18-нд эхэлж, өнөөдөр үргэлжилсэн юм.

УИХ 2020 онд баталсан 23 дугаар тогтоолоор энэхүү үндсэн чиглэлийг 9 бодлого, зорилгын хүрээнд 47 зорилт, 243 арга хэмжээтэй хэрэгжүүлэхээр тогтоосон. Гэвч аудитын тайланд тэмдэглэснээр, эдгээр арга хэмжээ нь батлагдсан 95 шалгуур үзүүлэлттэй уялдаа муутай байжээ. Тухайлбал, 243 арга хэмжээнээс 108 нь шалгуур үзүүлэлтгүй, суурь болон хүрэх түвшингүй байгаа нь хуулийн шаардлагыг хангахгүй байна гэж дүгнэсэн байна.

Гүйцэтгэлийн аудитын үр дүнгээр уг үндсэн чиглэл 67.7 хувьтай хэрэгжсэн бөгөөд зорилго, зорилт нь хууль тогтоомжийн шаардлагад нийцэхгүй боловсруулагдсан нь хэрэгжилтэд сөргөөр нөлөөлсөн хэмээн дурджээ. Үүнээс болж бодит үр дүнг үнэлэх боломж хязгаарлагдаж, нийгэм, эдийн засаг, байгаль орчны тогтвортой хөгжилд үзүүлэх эерэг нөлөө бүдгэрсэн байна.

2021-2024 онд энэхүү үндсэн чиглэлд нийт 21.7 их наяд төгрөгийн хөрөнгө зарцуулсан ч бодит үр дүн тодорхой бус байгааг онцолжээ. Иймд Үндэсний аудитын газраас хөрөнгө оруулалтын хөтөлбөрт тусгах төсөл, арга хэмжээнд судалгаа, тооцоо, үнэлгээг иж бүрэн хийхийг, мөн зорилго, зорилт, хариуцах байгууллага, хэрэгжүүлэх хугацааг тодорхой тусгасан төлөвлөлтийг хуульд нийцүүлэн боловсруулахыг зөвлөжээ.

Мөн Үндэсний статистикийн хороо, Монголбанк, Сангийн яам зэрэг байгууллагуудын хуулиар хүлээсэн чиг үүргийг хангуулж ажиллах шаардлагыг онцолсон байна. Хэлэлцүүлгийн үеэр Ерөнхий аудитор Д.Загджав аудитын дүгнэлт олон улсын стандартын дагуу хараат бусаар хийгддэгийг тодотгож, салбар бүрийн онцлогт тохирсон аргачлал, шалгуур үзүүлэлтийг хөгжлийн төлөвлөлтөд хэрэгжүүлэхийг сануулав.

Эцэст нь хамтарсан байнгын хорооны санал, дүгнэлтийг УИХ-ын чуулганы нэгдсэн хуралдаанд танилцуулахаар болсон байна.

Эх сурвалж: Төрийн аудитын газар, УИХ.