Нийслэлийн Засаг даргын захирамжийн хүрээнд нийслэлийн өнгө үзэмжийг сайжруулах, иргэдийн эрүүл, аюулгүй, ая тухтай орчинд амьдрах нөхцөлийг бүрдүүлэх, явган хүний зам, талбайн хүрэлцээг нэмэгдүүлэх зорилгоор нийтийн эзэмшлийн зам, талбайн зөрчлийг арилгах ажлыг энэ оны гуравдугаар сарын 10-ны өдрөөс эхлүүлээд байна.

Сонгинохайрхан дүүргийн нутаг дэвсгэрт энэ хүрээнд 2025 оны гуравдугаар сарын 14-21-ний өдрүүдэд есөн хороонд гурван ажлын хэсэг ажиллаж, нийт 303 зөрчил илрүүлж, тэдгээрийг Qfield аппликейшн-д бүртгэн авчээ. Зөрчлийн ангиллыг дараах байдлаар тогтоосон байна:

• Дэд бүтэц, инженерийн байгууламжтай холбоотой зөрчил – 76

• Тохижилт, ногоон байгууламжтай холбоотой зөрчил – 120

• Авто зам, замын байгууламжтай холбоотой зөрчил – 46

• Барилга байгууламж, худалдааны зориулалттай зөрчил – 61

Хяналт шалгалтын хүрээнд зөрчлөө арилгах тухай 69 албан мэдэгдэл, шаардах хуудсыг холбогдох иргэн, аж ахуйн нэгжид хүргүүлээд байна. Энэ зөрчлүүдийг тавдугаар сарын 9-ний дотор шийдвэрлэх үүрэг өгчээ.

Мөн явцын хяналтаар илрүүлсэн нийт 72 зөрчил–д орон сууцны лифт, норм дүрэм зөрчсөн барилгын хашаа, гэрэлтүүлгийн шон, тагжуулалт, удирдлагын шит зэрэг багтсан бөгөөд эдгээрийг шууд арилгаж, нийтийн эзэмшлийн талбайг чөлөөлсөн байна.

Энэ ажлыг цаашид ч шат дараатайгаар үргэлжлүүлж, нийтийн эзэмшлийн зам талбайн зөрчлийг бүрэн арилгахыг зорьж байгааг албаныхан мэдэгдэж байна.

Эх сурвалж: НЗДТГ