Монгол Улсын Ерөнхий сайд Л.Оюун-Эрдэнэ Монгол Улс, БНХАУ-ын Засгийн газар хооронд Гашуунсухайт-Ганцмод боомтын хил дамнасан төмөр зам, нүүрс худалдах, Тавантолгойн уурхайн хүчин чадлыг нэмэгдүүлэх хамтын ажиллагааны тухай хэлэлцээрийг соёрхон батлах хуулийн төслийг өнөөдөр УИХ-ын дарга Д.Амарбаясгаланд өргөн барилаа.
Засгийн газраас хөгжлийн 14 мега төсөл дотроос нэн тэргүүнд эрэмбэлсэн Гашуунсухайт-Ганцмод боомтын төмөр замын холболтын төслийн хэлэлцээр-ийг УИХ-аар хэлэлцүүлж, баталсны үндсэн дээр 2025 оны хоёрдугаар сарын 14-нд хоёр тал гарын үсэг зурсан юм.
Хэлэлцээрийг соёрхон баталснаар:
- Гашуунсухайт-Ганцмод боомтын хил холболтын төмөр замын бүтээн байгуулалтын тендерийг энэ сард зарлана.
- УИХ-ын хаврын чуулганы эхэнд баталж, ажлыг цаг алдалгүй эхлүүлэх боломжтой болно.
- Компани хоорондын гэрээнүүд хийгдэж, бүтээн байгуулалт албан ёсоор эхэлнэ.
Хөрөнгө оруулалтын үр ашиг
Гашуунсухайт-Ганцмод хил дамнасан төмөр зам нь Монгол Улс, БНХАУ-ын хооронд 1955 оны хэлэлцээрээр байгуулсан Замын-Үүд-Эрээн төмөр замаас хойш хийгдэж буй хоёр дахь холболтын төмөр зам юм.
Төмөр зам ашиглалтад орсноор:
- Боомтын хүчин чадал хоёр дахин нэмэгдэнэ.
- Нүүрсний экспорт 83 сая тонноос 165 сая тонн болж өснө.
- Нүүрсний борлуулалтын орлого жилд 1.5 тэрбум ам.доллараар нэмэгдэнэ.
- Нэг хүнд ногдох ДНБ 10 мянган ам.долларт хүрэх зорилт биелнэ.
- Монгол Улсын орлогын албан татварын орлого хоёр дахин нэмэгдэнэ.
- Үндэсний баялгийн сангийн Хуримтлалын сангийн орлого нэмэгдэнэ.
- Татварын реформыг хэрэгжүүлэх суурь нөхцөл бүрдэнэ.
Мөн Монгол, Хятадын хамтын ажиллагааны хүрээнд Шивээхүрэн-Сэхээ, Бичигт-Зүүнхатавч, Ханги-Мандалын боомтуудыг төмөр замаар холбох, баруун, зүүн тэнхлэгийн төмөр замын төслүүдийг үе шаттай хэрэгжүүлэх нөхцөл бүрдэх юм.
Эх сурвалж: Засгийн газрын Хэвлэл мэдээлэл, Олон нийттэй харилцах газар
