Шуурхай штабын VII хуралдаан энэ сарын 15-нд болж, нийслэлд хэрэгжүүлэх томоохон төслүүдийн талаар хэлэлцлээ.

Хотын дэд бүтцийн томоохон төслүүд

Хуралдаанаар Туулын хурдны зам, Тойрог хурдны зам, Босоо тэнхлэгийн экспресс зам зэрэг дэд бүтцийн төслүүдийг танилцууллаа. Тэдгээрийн нэг болох Босоо тэнхлэгийн экспресс зам нь зуслангийн бүсээс эхэлж, хотын төвөөр дамжин Сэлбэ голын дагуу хотын хойд болон урд хэсгийг холбох зорилготой. Энэ зам нь Туулын хурдны зам, Тойрог хурдны замтай огтлолцож, Хөшигийн хөндий болон Хүннү дагуул хоттой холбогдох гарц болохоор төлөвлөгджээ.

Зам, тээврийн сайд Б.Дэлгэрсайхан энэхүү төслийн талаар танилцуулж, түүнийг хэрэгжүүлэхдээ газар чөлөөлөлт, хотын ерөнхий төлөвлөлт, бүтээн байгуулалтын бусад ажлуудтай уялдуулах шаардлагатайг онцоллоо. Хотыг хойноос урагш тэлэх нь хамгийн үр ашигтай гэдэг судалгааг Ерөнхий сайд Л.Оюун-Эрдэнэ дэмжиж, бүх талын тооцоог сайтар хийж Засгийн газрын хуралдаанд танилцуулахыг үүрэг болгов.

Ногоон бүсийн гэр хорооллын дулаалга, агаарын бохирдлыг бууруулах асуудал

Нийслэлийн ногоон бүсэд 10,141 өрх гэрт, 15,228 өрх орон сууцанд амьдарч байгаа бөгөөд эдгээрийн дулаан алдагдлыг бууруулснаар халаалтын зардлыг 2-3 дахин багасгах боломжтой гэдгийг Хот байгуулалт, барилга, орон сууцжуулалтын яамнаас мэдээлэв. Мөн 1960-1980 оны угсармал орон сууцнуудын дулаан алдагдлыг бууруулах шаардлагатай гэж дүгнэсэн байна.

Ерөнхий сайд Л.Оюун-Эрдэнэ Баянзүрх дүүргийн 13-р хорооны иргэн Б.Төгсжаргалынд зочилж, тэдний хийн түлшний зуух суурилуулсан туршлагатай танилцав. Одоогоор тус дүүргийн 30 гаруй айл ийм зуухтай болжээ. Нийслэлийн удирдлагууд бусад дүүрэгт зорилтот бүлгийн айл өрхийг хийн түлшний хэрэглээнд үе шаттайгаар шилжүүлэхээр төлөвлөж байгаагаа танилцуулсан.

Ерөнхий сайд "дулаан гэр"-ийн стандарт бий болгож, өртөг багатай, иргэдийн худалдан авах чадварт нийцсэн дулаалгын технологи, материалуудыг олон нийтэд танилцуулах хэрэгтэй гэж онцоллоо.

Тулгамдсан асуудлуудыг шуурхай шийдвэрлэх үүрэг өглөө

Нийслэлд хэрэгжүүлэх төслүүдийг уялдаа холбоотой, шуурхай хэрэгжүүлэхийг Ерөнхий сайд Л.Оюун-Эрдэнэ Шуурхай штабын гишүүдэд үүрэг болголоо. Тэрбээр агаарын бохирдол, түгжрэлийг бууруулах ажлуудыг энэ хавар, зуны турш тасралтгүй үргэлжлүүлэх шаардлагатайг анхааруулсан байна.