Иргэн О.Отгонтөгс авто машины татварын нэмэгдэлтэй холбоотойгоор хотын удирдлагуудад шаардлага хүргүүлсэн бөгөөд үүнийг НИТХ-ын дарга А.Баяр хүлээн авч, түүнтэй уулзлаа.

НИТХ-ын дарга А.Баяр уулзалтын үеэр "Иргэний нийгмийн байгууллага иргэдийнхээ үгийг сонсох үүрэгтэй. Тиймээс иргэн, төр хоорондоо ойлголцож, хамтраад асуудлаа шийдвэрлэх нь чухал. Авто машины татварыг нэмэгдүүлэх нь Улаанбаатар хотын авто замын сүлжээг өргөтгөн сайжруулах, түгжрэлийг бууруулах зорилготой. Хотын бүтээн байгуулалтыг шинэчлэн төлөвлөж, олон төвт хот болгон хөгжүүлэхээр ажиллаж байна. Энэ хүрээнд гарч буй шийдвэрүүдийг иргэд, олон нийтэд ил тод мэдээлж, хамтран ажиллана" гэж онцоллоо.

Тэрбээр мэдээлэл дутуу, ойлголт хангалтгүй байдлаас үүдэн төр, иргэдийн хооронд үл ойлголцол үүсдэг тул иргэдийн мэдээлэл авах оролцоог нэмэгдүүлэх нь чухал байгааг цохон тэмдэглэв.

Эх сурвалж: НИТХ-ХМОНХА