Монгол Улсын Засгийн газар Бүгд Найрамдах Австри Улсад ажиллаж, амьдарч буй иргэдийн нийгмийн хамгааллын баталгааг хангах зорилгоор хоёр улсын хооронд Нийгмийн хамгааллын хэлэлцээр байгуулахаар ажиллаж байна.
Энэ хүрээнд “Нийгмийн хамгааллын тухай Монгол Улс болон Бүгд Найрамдах Австри Улсын хоорондын хэлэлцээр”-ийн шинжээчдийн түвшний эцсийн буюу 3 дахь шатны хэлэлцээ энэ сарын 11-13-ны өдрүүдэд Улаанбаатар хотноо болж, хэлэлцээрийн болон хэрэгжилтийн Удирдлагын тохиролцооны төслийг эцэслэн тохиролцов.
Талууд хэлэлцээрт гарын үсэг зурах бэлтгэл ажлыг холбогдох хууль тогтоомжийн дагуу эхлүүлэхээр тохиролцсон бөгөөд ирэх тавдугаар сард албан ёсоор гарын үсэг зурах төлөвтэй байна.
Хэлэлцээр соёрхон батлагдсанаар:
- Монгол, Австрийн иргэд хоёр улсад ажилласан хугацаандаа төлсөн нийгмийн даатгалын шимтгэлээ нэгтгэн тооцуулах боломжтой болно.
- Хоёр улс харилцан тэтгэврийн эрхийг баталгаажуулж, иргэд өөрийн төлсөн шимтгэлд ногдох тэтгэврийг тогтоолгон авах боломж бүрдэх юм.
Одоогоор БНАУ-д Монгол Улсын 2600 орчим иргэн, Монгол Улсад БНАУ-ын 40 орчим иргэн оршин сууж байна.
