Баянгол, Хан-Уул, Сонгинохайрхан дүүргийн Иргэний хэргийн анхан шатны шүүхийн шүүгч Г.Төрболд нийслэлийн Засаг дарга бөгөөд Улаанбаатар хотын захирагч Х.Нямбаатарын нэг тэрбум төгрөгийн хөрөнгийг битүүмжлэх захирамж гаргажээ.

Энэхүү арга хэмжээг “Эко автомашин импортлогчдын холбоо”, “Авто худалдаа, машины бизнес эрхлэгчдийн холбоо” гэсэн төрийн бус байгууллагуудын нэхэмжлэлтэй хэрэгтэй холбоотойгоор авч хэрэгжүүлсэн байна. Эдгээр холбоод нийслэлийн Засаг дарга Х.Нямбаатарын эсрэг шүүхэд гомдол гаргаж, ажил хэргийн нэр хүндээ сэргээлгэх, нэг тэрбум төгрөг нэхэмжлэх хүсэлт гаргасан аж.

Хэргийг үндэслэх болсон шалтгаан нь Х.Нямбаатар нийслэлийн ИТХ-ын ээлжит бус хуралдааны үеэр автомашины худалдаа эрхлэгчдийн талаар "Машины ченжүүд намайг огцруулна гэж акц хийж байна гэсэн. Халтар төгрөг цуглуулсан хэдэн ченжээс айж, ичээд байх юм байхгүй. Монгол мөнгийг хамгийн их гадагшлуулж байгаа хүмүүс. Нэг тэрбум ам.долларыг энэ хүмүүс гадагшлуулж байгаа юм. Өчнөөн жил ард иргэдээ шулж амьдарлаа шүү дээ. Энэ хүмүүс татвар төлөхгүй" хэмээн хэлсэнтэй холбоотой юм.

Түүний энэ үг олон нийтийн сүлжээнд тархаж, нэг сая орчим хандалт авчээ. Харин бизнес эрхлэгчдийн зүгээс уг мэдэгдэл нь нэр хүндэд нь халдсан, илт худал мэдээлэл тараасан гэж үзэж буй бөгөөд шүүхээс гарах шийдвэрийг баталгаажуулах зорилгоор түүний хөрөнгийг битүүмжлэх хүсэлт гаргасан байна. Шүүх уг хүсэлтийг үндэслэн дээрх захирамжийг гаргасан аж.