Гадаад харилцааны сайд Б.Батцэцэг Япон Улсад хийж буй албан ёсны айлчлалынхаа хүрээнд “Onodera User Run” компанийн төлөөлөлтэй уулзаж, Монгол залуусыг Японд сургаж, дадлагажуулах хамтын ажиллагааны талаар ярилцлаа.
Манай улс ойрын жилүүдэд хэрэгжүүлэх эдийн засаг, хөрөнгө оруулалтын төслүүд, томоохон бүтээн байгуулалтад мэргэжилтэй, чадварлаг ажиллах хүчин шаардлагатай байгаа тул залуусыг төрөл бүрийн чиглэлээр Японд сургаж, дадлагажуулах асуудал чухал ач холбогдолтой гэж үзэж байна.
Тус компанийн төлөөлөгчид Монголын залуусыг орон нутгийн мэргэжлийн сургалтын төвүүдэд бэлтгэн, япон хэлний мэдлэг олгох, тодорхой хугацаанд дадлагажуулах боломжтой бөгөөд энэ үйл ажиллагааг зуучлалын хөлс, нэмэлт төлбөргүйгээр хэрэгжүүлэх сонирхолтой байгаагаа илэрхийлэв.
Энэхүү хөтөлбөр нь залуусыг өндөр хөгжилтэй оронд сургаж, шинэ техник, технологи, нөү-хау эзэмшүүлэх замаар Монгол Улсын хүний нөөцийн чадамжийг нэмэгдүүлэх төдийгүй Монгол, Японы тусгай стратегийн түншлэлийг бэхжүүлэх ач холбогдолтой.
Уулзалтын төгсгөлд Гадаад харилцааны сайд Б.Батцэцэг тус компанийн төлөөлөгчдийг ойрын хугацаанд Монгол Улсад хүрэлцэн ирж, нөхцөл байдалтай танилцан судлахыг урьсан гэж Гадаад харилцааны яамнаас мэдээлэв.
