Монгол Улсаас УИХ-ын гишүүн Б.Мөнхсоёл, НҮБ-ын Ази, Номхон далайн Эдийн засаг-Нийгмийн комиссын дэргэд суугаа Байнгын төлөөлөгч, Элчин сайд А.Төмөр, Жендэрийн үндэсний хорооны нарийн бичгийн дарга Т.Энхбаяр тэргүүтэй төлөөлөгчид Тогтвортой хөгжлийн асуудлаарх Ази, Номхон далайн бүс нутгийн XII чуулганд оролцож байна.

Чуулган “Ази, Номхон далайн бүс нутагт хөгжлөөс хэнийг ч орхигдуулахгүй байх, Тогтвортой хөгжлийн зорилгуудыг (ТХЗ) хангах хүртээмжтэй, шинжлэх ухаан, нотолгоонд суурилсан шийдлүүдийг урагшлуулах нь” сэдвийн хүрээнд 2-р сарын 25-28-нд Тайландын Бангкок хотноо болж байна.

Чуулганы хүрээнд НҮБ-ын Ази, Номхон далайн Эдийн засаг-Нийгмийн комисс (АНДЭЗНК)-ын төв байранд “Үндэсний сайн дурын илтгэл: Жендэрийн тэгш байдалд чиглэсэн иргэний нийгмийн оролцоо” сэдэвт дагалдах арга хэмжээ зохион байгуулагдсан бөгөөд УИХ-ын гишүүн Б.Мөнхсоёл хэлэлцүүлгийг удирдаж, Жендэрийн үндэсний хорооны нарийн бичгийн дарга Т.Энхбаяр үндсэн илтгэлийг танилцуулжээ.

Чуулганы онцлох үйл явдлууд

• "Сонсголын бэрхшээлтэй иргэдийн соёлын төв" ТББ-ын бүтээл "Газар, Тэнгэрийн дундах цуурай: Сонсголгүй монгол малчин" баримтат киноны бүсийн албан ёсны нээлт болж, гэрэл зургийн үзэсгэлэн дэлгэгдэв.
• Чуулган нь 2030 он хүртэлх Тогтвортой хөгжлийн 17 зорилтод хүрэхэд чиглэсэн мэдээлэл өгөх, чадавхжуулах, дэмжих, туршлага хуваалцах зорилготойгоор зохион байгуулагдаж байна.
• УИХ-ын гишүүн Б.Мөнхсоёл чуулганы жендэрийн асуудлаарх хэлэлцүүлгийг удирдаж, Монгол Улсыг төлөөлж Жендэрийн үндэсний хорооны нарийн бичгийн дарга Т.Энхбаяр илтгэл тавьж байна.

Тус чуулган нь бүс нутгийн ялангуяа буурай хөгжилтэй, далайд гарцгүй хөгжиж буй орнууд болон жижиг арлын хөгжиж буй улс орнуудын чиг хандлагыг тодорхойлох, шилдэг туршлагыг хуваалцах чухал ач холбогдолтой юм.

Эх сурвалж: АНДЭЗНК, Монгол Улсын Жендэрийн үндэсний хороо.