Монгол Улсын Их Хурлын дарга Д.Амарбаясгалан энэ сарын 26-нд БНХАУ-ын Улс Төрийн Зөвлөлдөх Зөвлөлийн Үндэсний хорооны дарга Ван Хунинтай Бээжин хотын Ардын Их Хурлын ордонд уулзлаа.

Хятадын тал Монгол Улстай хөгжүүлж буй харилцаа, хамтын ажиллагааг чухалчилж, хоёр улсын дээд, өндөр түвшинд тохиролцсон ажлуудыг бодит ажил хэрэг болгож, ард иргэдэд бодит үр өгөөжийг хүргэхийн төлөө байгаагаа илэрхийлэв. УИХ-ын дарга Д.Амарбаясгалан Монгол Улсын шинээр бүрдсэн парламентын онцлог, хууль эрх зүйн шинэчлэлийн бодлогын хүрээнд “Гурван төгөлдөршил”-ийн бодлогыг хэрэгжүүлж буйгаа танилцууллаа.

Тэрбээр хоёр улсын хөгжлийн бодлого, төлөвлөлтийн уялдааг гүнзгийрүүлэх шаардлагатайг онцолж, ирэх онд батлагдах БНХАУ-ын 15 дугаар таван жилийн төлөвлөгөөнд Монгол, Хятадын хамтын төсөл, зорилтуудыг тусгах нь хамтын ажиллагааг өргөжүүлэхэд чухал ач холбогдолтойг тэмдэглэв.

Талууд бүсчилсэн хөгжлийн хүрээнд Булган-Такашикен боомтын бүтээн байгуулалтыг эрчимжүүлэх, өндөр технологи, сэргээгдэх эрчим хүч, хөдөө аж ахуй, мал аж ахуйн салбарын хамтын ажиллагааг өргөжүүлэх асуудлаар хэлэлцэн, нэгдсэн ойлголцолд хүрлээ.

Хятадын Улс Төрийн Зөвлөлдөх Зөвлөлийн Үндэсний хорооны дарга Ван Хунин тус улсын гадаад бодлого хөрш орнуудтай харилцан ашигтай, нээлттэй харилцах зарчим дээр тулгуурлаж буйг онцлон, Монгол Улстай хөгжлийн үр шимээ хуваалцахад бэлэн байгаагаа илэрхийллээ.

Тэрбээр Хятадын гол идеологичдын нэг бөгөөд “Шинжлэх ухаанч хөгжлийн үзэл баримтлал”, “Хятадын мөрөөдөл”, “Хамтын хөгжил цэцэглэл” зэрэг бодлогыг боловсруулахад чухал үүрэг гүйцэтгэсэн улс төрч юм.

Эх сурвалж: УИХ-ын Хэвлэл мэдээллийн алба.