Хятадын эрдэмтэд шууд квант харилцаа холбооны дээд амжилтыг тогтоож, энгийн холбооны шугамаар 100 гаруй км-ийн зайд өгөгдлийг 168 цагийн турш тогтвортой дамжуулж чаджээ. Энэ тухай Бээжингийн квант мэдээллийн академи мэдээлсэн байна.
Энэхүү туршилтыг Цинхуа их сургууль, Хойд Хятадын технологийн их сургуультай хамтран гүйцэтгэсэн бөгөөд туршилтын явцад өгөгдлийг 104.8 км урт шилэн кабелиар секундэд 2.38 кбитийн хурдтайгаар дамжуулсан байна. Энэ нь квантын шууд холбоог практикт амжилттай хэрэгжүүлж болохыг харуулсан чухал үр дүн болжээ.
Эрдэмтэд хэрэглээнд зориулсан мэдээлэл дамжуулах, хүлээн авахад ашиглагдах бүрэн хэмжээний төхөөрөмж зохион бүтээсэн бөгөөд үүнд мэдээллийг кодлох орчин үеийн аргыг нэвтрүүлсэн байна. Энэ шинэ технологийг аюулгүй байдалд өндөр шаардлага тавигддаг салбаруудад ашиглах боломжтой гэж судлаачид онцолжээ.
Шууд квант харилцаагаар дамжуулсан өгөгдлийг замаас нь "унших" боломжгүй бөгөөд ямар нэгэн гадны нөлөө орсон тохиолдолд мэдээлэл өөрөө өөрийгөө устгадаг технологитой аж. Энэ нь мэдээллийн нууцлалыг өндөр түвшинд хамгаалах боломжийг бүрдүүлж байна.
Эх сурвалж: Xinhua
