Нийслэлийн Хан-Уул дүүргийн Морингийн даваанд байрлах барилгын хатуу хог хаягдал дахин боловсруулах үйлдвэр өдөрт 100 тонн хог боловсруулах хүчин чадалтайгаар ашиглалтад орлоо.
Тус үйлдвэрт ландфил нягтаршуулагч, барилга нураалтын экскаватор, бульдозер, дугуйт ачигч, усны машин, өөрөө буулгагч автомашин зэрэг 29 нэр төрлийн хүнд даацын машин, механизм, сэлбэг хэрэгсэл шинээр нийлүүлжээ.
8.5 сая тонн хог хүлээн авах хүчин чадалтай
Үйлдвэрийн ландфил байгууламж нь байгаль орчинд сөрөг нөлөөгүй, эрүүл ахуйн шаардлага хангасан 8.5 сая тонн хог хаягдлыг хүлээн авах хүчин чадалтай.
Төслийн санхүүжилт, хэрэгжилт
- Нийслэлийн Засаг даргын Тамгын газрын захиалгаар
- Европын сэргээн босголт, хөгжлийн банкны санхүүжилтээр
- Европын холбооны буцалтгүй тусламжийн хүрээнд хэрэгжсэн.
- Тус үйлдвэр нь:
- Шинэ ландфил байгууламж
- Барилгын хог бутлах, ангилах үйлдвэрийн талбай
- Машин механизмын гарааш
- Оффисын барилгаас бүрджээ.
Улаанбаатар хотын хог хаягдлын нөхцөл байдал
- Жилд дунджаар 1.4 сая тонн хог төвлөрсөн гурван цэгт цуглардаг.
- Хог хаягдлын 11.4% нь дахин боловсруулагддаг, 88.6% нь булшлагддаг.
- Барилгын хог нийт хаягдлын 20-30%-ийг эзэлдэг.
Үйлдвэрийн ач холбогдол
- Барилгын хог хаягдлыг боловсруулж хайрга, дайрга болгон эдийн засгийн эргэлтэд оруулах
- Хогийн цэгийн тоог бууруулах
- Нүүрстөрөгчийн давхар ислийн ялгарлыг багасгах
- Ус, эрчим хүчийг хэмнэх
- Тогтвортой ажлын байр нэмэгдүүлэх
Нийслэлийн Ерөнхий менежер бөгөөд Захирагчийн ажлын албаны дарга Г.Батзориг үйлдвэрийн үйл ажиллагаатай танилцах үеэрээ уг төслийн байгаль орчин, эдийн засгийн үр өгөөжийг онцлон тэмдэглэсэн болохыг НЗДТГ-ын ХМОНХХ мэдээлжээ.
