Хөрөнгө оруулалтын боломжууд, хамтын ажиллагааны чиглэл

Уулзалтын үеэр Монгол Улсад эрчим хүч, уул уурхай, хөдөө аж ахуйн салбарт хөрөнгө оруулах боломжуудыг судлах, соёлын салбарын хамтын ажиллагааг өргөжүүлэх, мөн Бахрайны хаант улсын амины орон сууцны хөгжүүлсэн менежмент, гадаадын хөрөнгө оруулалт татах сайн туршлагыг нэвтрүүлэх талаар хэлэлцэв.

Шадар сайд Т.Доржханд уулзалтын үеэр:

“Монгол Улс өргөн уудам газар нутагтай, эрдэс баялгийн арвин нөөцтэй. Дэлхийн хоёр дахь том эдийн засагтай хамгийн ойр оршдог бөгөөд гадаадын хөрөнгө оруулалтад нээлттэй ханддаг улс. Саудын Араб, Арабын Нэгдсэн Эмират зэрэг булангийн орнууд Монгол Улсад хөрөнгө оруулах, ялангуяа эрчим хүчний салбарт сонирхолтой байна. Монгол Улсын хувьд Бахрайны хаант улстай эрчим хүч, уул уурхай, хөдөө аж ахуй, соёлын салбарт хамтран ажиллахаар зорьж байна” гэж мэдэгдлээ.

Бахрайны талын байр суурь

Бахрайны Хаант Улсын Шадар сайд Шейх Халид бин Абдулла Аль Халифа Монгол Улсын Шадар сайдын айлчлалыг талархан хүлээн авч, тус улс гадаадын хөрөнгө оруулалтыг амжилттай татсан туршлагаасаа хуваалцахад бэлэн байгаагаа илэрхийлэв.

Тэрбээр тээвэр ложистик, уул уурхай, хөдөө аж ахуй, эрчим хүч болон мэдээллийн төв байгуулах чиглэлээр хамтран ажиллах боломжтойг дурдсан бөгөөд

“Монгол Улс БНХАУ-д сэргээгдэх эрчим хүч экспортлох боломжтой болсныг Арабын орнуудын Засгийн газар онцгойлон анхаарч, энэ чиглэлд хамтран ажиллахад бэлэн байна” гэж онцоллоо.

Өндөр түвшний уулзалтууд

Айлчлалын хүрээнд Монгол Улсын Шадар сайд Т.Доржханд Бахрайны Хаант Улсын Ханхүү бөгөөд Эрчим хүч, байгалийн нөөцийн дээд хорооны дарга, Үндэсний аюулгүй байдлын зөвлөх, Хааны харуулын хүчний командлагч Шейх Нассер бин Хамад Аль Халифатай уулзаж, хоёр улсын хамтын ажиллагааны талаар санал солилцов.

Монгол Улсын Ерөнхий сайдын дэргэдэх Эдийн засгийн хөгжлийн зөвлөл Бахрайны хаант улсын хөрөнгө оруулалтын сайн туршлагыг судалж, хэрэгжүүлэхээр ажиллаж буйг ЗГХМОНХГ-аас мэдээллээ.

Эх сурвалж: Засгийн газрын Хэвлэл мэдээлэл, олон нийттэй харилцах газар