Сэлэнгэ аймгийн Алтанбулаг боомтоор өнгөрсөн нэгдүгээр сард ОХУ-руу зорчиж байсан Монгол Улсын иргэн Э-ийн гар тээшинд гаалийн байгууллагын алба хаагчид нарийвчилсан үзлэг хийж, соёлын өвд хамаарах магадлалтай гурван ширхэг хүрэл толь илрүүлэн, хурааж авчээ.

Шинжээчдийн дүгнэлтээр, эдгээр эд өлгийн зүйлс нь Монголын эзэнт гүрний 5 дахь их хаан Хубилай хааны үед (1268-1338 он) хамаарах болох нь тогтоогдсон байна. Тодруулбал, 13.4-13.9 см диаметртэй, 351-406 гр жинтэй тус гурван хүрэл толь нь “хос луутай бадамлянхуа хийцтэй тольны төрөл” болохыг Соёлын өвийн Үндэсний төв дүгнэжээ.

Одоогоор тус хүрэл толийг хууль, хяналтын байгууллагад шилжүүлсэн бөгөөд хяналт, шалгалтын ажиллагаа үргэлжилж байна.

Гаалийн байгууллагын хяналт шалгалтын үр дүн

Өнгөрсөн онд гаалийн байгууллага үндэсний аюулгүй байдлыг хамгаалах чиг үүргийнхээ хүрээнд:

• Гэмт хэргийн шинжтэй 55 хэрэг
• Зөрчлийн шинжтэй 2306 зөрчил илрүүлэн хууль, хяналтын байгууллагад шилжүүлжээ.
• Нийт зөрчлийн 27.4 хувь нь барааг хууль бусаар нэвтрүүлэхтэй холбоотой байсан байна.

Хууль бус үйлдэлд оноох шийтгэл

Монгол Улсын Эрүүгийн хууль болон Зөрчлийн тухай хууль-д түүх, соёлын дурсгалт зүйлийг хилээр хууль бусаар нэвтрүүлэх оролдлогыг дараах байдлаар шийтгэхээр заажээ:

• Эрүүгийн хуулиар:

  • 10,000-40,000 нэгжтэй тэнцэх хэмжээний төгрөгөөр торгох
  • Хоёр жилээс найман жил хүртэл хорих

• Зөрчлийн тухай хуулиар:

  • Эд зүйлийг хураах
  • Хувь хүнийг 100 нэгжтэй тэнцэх хэмжээний төгрөгөөр торгох
  • Хуулийн этгээдийг 1,000 нэгжтэй тэнцэх хэмжээний төгрөгөөр торгох

Эх сурвалж: Гаалийн Ерөнхий газар