Нийслэлийн агаарын чанарыг сайжруулах бүсэд нийт 2200 орчим уурын болон усан халаалтын зуухтай объект үйл ажиллагаа явуулдаг гэсэн судалгаа гарчээ. Он гарснаас хойш Байгаль орчин, уур амьсгалын өөрчлөлтийн яам, Нийслэлийн агаар, орчны бохирдолтой тэмцэх газар хамтран төлөвлөгөөт бус хяналт шалгалт хийсэн байна.
Энэхүү шалгалтаар 100 кВт-аас дээш хүчин чадалтай уурын болон усан халаалтын зуух ашиглаж буй 100 объектод хяналт хийж, нийт 496 зөрчил илрүүлжээ. Хуулийн хэрэгжилт 58.2 хувьтай байгаа нь хангалтгүй үзүүлэлт болохыг онцолсон байна.
Илэрсэн гол зөрчлүүд:
- 76% – Ус ашиглах дүгнэлт, зөвшөөрөлгүйгээр үйл ажиллагаа явуулсан
- 75% – Зуухны яндангаас гарах бохирдуулагч бодисын шинжилгээ хийлгээгүй
- 70% – Байгаль орчны менежментийн төлөвлөгөө боловсруулж батлуулаагүй
- 67% – Агаарын бохирдлыг хянах дотоод хяналтын багажгүй, агаар бохирдуулсны төлбөр төлөөгүй
- 60% – Утаа шүүгч, үнс баригч төхөөрөмжийг стандартын дагуу суурилуулаагүй
- 42% – Зуухнаас гарсан үнс, хог хаягдлыг ангилан ялгахгүй хаядаг
- 35% – Байгаль орчинд нөлөөлөх байдлын үнэлгээ хийлгээгүй
Шалгалтад хамрагдсан ААН-үүдийн 45% нь өндөр эрсдэлтэй, 24% нь дунд эрсдэлтэй, 31% нь бага эрсдэлтэй гэж үнэлэгдсэн байна.
Байгаль орчны багц хуулийн хэрэгжилт:
- 56.6% – Хангалтгүй гэж үнэлэгдэв
- Агаар бохирдуулсны төлбөрийн тухай хууль батлагдсан ч хэрэгжилт хангалтгүй
- Химийн бодисыг зөвшөөрөлгүй ашигласан байгууллагуудын зөрчлийг холбогдох байгууллагуудад шилжүүлэн ажиллаж байна
Шийдвэрлэх шаардлагатай асуудлууд:
- Нийслэлийн төвийн дулааны шугамд холбогдоогүй барилга, байгууламжийг холбох
- Газо халаагуур зэрэг байгаль орчинд ээлтэй шийдлүүдийг нэвтрүүлэх
- Агаар бохирдуулагч эх үүсвэрүүдийн хяналтыг сайжруулж, хариуцлагагүй ААН-үүдэд хуулийн хариуцлага тооцох
Агаарын бохирдлын эсрэг хяналт, шалгалтыг үргэлжлүүлж, эрсдэлийн үнэлгээ, хууль эрх зүйн хэрэгжилтийг сайжруулах шаардлагатай гэж албаныхан дүгнэжээ.
