Улаанбаатар хотод

09:00 – “Хиймэл оюуны хэрэглээ ба Кибер аюулгүй байдал” сэдэвт сургалт Гадаад харилцааны яаманд болно.

09:30 – Байгаль орчны стандартын хэрэгжилт ба эрх зүйн орчин, хүнсний салбарын стандартын хэрэгжилт ба эрх зүйн орчин сэдвээр хэлэлцүүлэг Төрийн ордны Их танхимд зохион байгуулагдана.

10:00 – “Цагаан алт” үндэсний хөдөлгөөн-Төр, хувийн хэвшлийн зөвлөлдөх уулзалт Төрийн ордны “Чингис хаан” танхимд болно. Уулзалтын нээлтэд Монгол Улсын Ерөнхийлөгч У.Хүрэлсүх оролцоно.

11:00 –

• Тээврийн хэрэгслийн улсын дугаарыг тэгш, сондгойгоор ангилан замын хөдөлгөөнд оролцуулах асуудлаар нийслэлийн Автозамын түгжрэлийг бууруулах төслийн зохицуулагч Д.Бадарсан болон ТЦА, ЗХУТ-ийн холбогдох албаныхан мэдээлэл хийнэ. Хэвлэлийн хурал Яармаг дахь "Хангарди" ордны Хүндэтгэлийн танхимд болно.
• Билгийн тооллын XVII жарны “Элдэв эрдэмт” хэмээх модон могой жилийн сар шинийн баярт зориулсан өсвөрийн бөхчүүдийн цуврал барилдаан эхэлнэ.
• ХЭҮК-ын гишүүний шаардлага, зөвлөмжийн хэрэгжилтийн талаар хэвлэлийн бага хурал зохион байгуулна. Уг хурлаар эрх бүхий байгууллага, албан тушаалтнууд Комиссын гишүүний шаардлага, зөвлөмжийн хэрэгжилтийг хангаж ажилласан эсэх болон хариуцлагын асуудлыг хөндөн ярилцана.
• Төв аймгийн Нэгдсэн эмнэлэг олон улсын Class1000 стандартын шаардлагад нийцсэн мэдээгүйжүүлэг, мэс заслын нэгдсэн тасагтай боллоо. Шинэ тасгийн нээлт болно. (Лавлах утас: 99153144)

14:00 – “Улаанбаатар В2В-Нийслэл хотын барилга, бүтээн байгуулалт” бизнес уулзалт Корпорейт Конвеншн центрийн “Улаанбаатар” танхимд болно. Уулзалтад барилгын материал үйлдвэрлэгчид, ханган нийлүүлэгчид, дэвшилтэт техник, технологи нэвтрүүлэгчид, барилгын салбарын компаниуд оролцоно. (Лавлах утас: 99995605)

19:00 – Улсын Филармонийн концертмейстер (төгөлдөр хуурч) О.Энхмөнхийн “Classic piano recital” концерт Kawai concert hall-д болно. Дэлхийн шилдэг хөгжмийн зохиолчдын бүтээлүүдээс эгшиглэнэ.

Хилийн чанадад

17:30 – Монгол Улсын сагсан бөмбөгийн шигшээ баг 2025 оны ААШТ-ий урьдчилсан шатны ээлжит тоглолтоо Гуамын багтай хийнэ. Тоглолтыг Премьер Спортс Нэтворк телевиз шууд дамжуулан үзүүлнэ.

Орон нутагт

• Хөвсгөл аймгийн Цагааннуур суманд өнөөдөр, маргааш “Цаа, цаачдын баяр” болно.