Монголчуудын уламжлалт сар шинийн баяр буюу билгийн тооллын хаврын тэргүүн сарын шинийн 1, 2, 3-ны өдрүүдийг бүх нийтээр амрахыг Хөдөлмөрийн тухай хуулийн дагуу зохицуулсан байдаг.

Гэвч энэ жил монгол одон зурхайн цаг тооллоор билгийн тооллын хаврын тэргүүн сарын шинийн 1-ний өдөр тасарч, шинийн 2, 3-ны өдөр нь гуравдугаар сарын 1, 2-нд тохиож байна. Тиймээс монголчууд шинийн 2, 3-ны өдрүүдэд сар шинийн баяраа тэмдэглэх бөгөөд гуравдугаар сарын 3-наас төрийн байгууллагуудын ажил хэвийн үргэлжилнэ.

Харин хувийн хэвшлийн байгууллагуудын тухайд ажил, амралтын өдрийг дотоод журмаараа зохицуулах боломжтой бөгөөд үүнийг компанийн бодлого, ажиллагсадын нөхцөл байдлаас хамааруулан шийдвэрлэх эрхтэй байна.

Баярын амралтыг шилжүүлэх зохицуулалт нэмэгдэж магадгүй

Цаашид нийтээр тэмдэглэх баярын өдрүүд долоо хоногийн амралтын өдөртэй давхцсан тохиолдолд ажлын өдөрт шилжүүлэх, нөхөн амраах зохицуулалтыг Хөдөлмөрийн тухай хууль, Нийтээр тэмдэглэх баярын болон тэмдэглэлт өдрүүдийн тухай хуульд тусгах хуулийн төслийг УИХ-ын хаврын чуулганд өргөн барихаар төлөвлөжээ.