Рио Тинто компани Инвескор ББСБ-тай хамтран жижиг, дунд бизнес эрхлэгчдийг дэмжих хөтөлбөрийг 2021 оноос хойш хэрэгжүүлж байгаа бөгөөд энэ хүрээнд олон ажлын байр хадгалагдаж, шинээр бий болжээ.
Хөтөлбөрийн хүрээнд хөнгөлөлттэй зээл олгосноор цар тахлын үед санхүүгийн хүндрэлд орсон бизнесүүдийг дэмжиж, 845 ажлын байр хадгалагдан, 40 гаруй ажлын байр шинээр бий болсон байна. Арьс ширний боловсруулалт, оёмол болон сүлжмэл бүтээгдэхүүн үйлдвэрлэх чиглэлээр жижиг үйлдвэрлэгчид санхүүгийн дэмжлэг авсан бөгөөд энэ нь гэрээр үйлдвэрлэл эрхэлж буй бизнес эрхлэгчдэд ч боломж олгожээ.
Бизнесүүдийг санхүүжилтэд хамруулахдаа 50 гаруй шалгуур тавьсан бөгөөд зөвхөн зээл олгоод зогсохгүй бизнесийн амжилттай үйл ажиллагаа явуулахад шаардлагатай санхүүгийн мэдлэг олгох сургалт, хөтөлбөрүүдийг мөн зохион байгуулсан байна.
Хөтөлбөрт хамрагдсан бизнес эрхлэгчдийн 82 хувь нь импортыг орлох үйлдвэрлэлийн салбарт үйл ажиллагаа явуулдаг бол тэдний 67 хувь нь эмэгтэйчүүд байна. Түүнчлэн, Рио Тинто болон Инвескор ББСБ хамтран хөрөнгө оруулалтын сан байгуулж, бизнес эрхлэгчдийн санхүүгийн эрсдэлийг давхар хамгаалах боломж бүрдүүлсэн нь тус хөтөлбөрийн нэг онцлог юм.
