Монгол Улсын Тэргүүн Шадар сайд, Эдийн засгийн хөгжлийн сайд Л.Гантөмөр өнөөдөр "Оюутолгой" компанийн гүйцэтгэх захирал Дэйрдрэ Лингенфэлдийг хүлээн авч уулзлаа.
"Оюутолгой" компанийн зүгээс Монголын Засгийн газарт тодорхой асуудлаар дэмжлэг хүсч байгаагаа илэрхийлжээ. Тодруулбал, зэсийн баяжмал экспортлоход тулгарч буй хүндрэл бэрхшээлийг зохицуулахад Монголын Засгийн газраас дэмжлэг үзүүлэхийг хүссэн байна.
Эдийн засгийн хөгжлийн сайд Л.Гантөмөр зэсийн баяжмалын экспортод тулгамдаж буй асуудлыг нааштайгаар шийдэж чадсанаар нүүрсний экспорт унасан үед валютын нөөцийг тогтвортой байлгах боломжтой гэж үзэж байгаагаа мөн илэрхийлжээ.
Учир нь сүүлийн саруудад нүүрсний экспорт зогсонги байдалд орсноор экспортын орлого буурч, валютын нөөц хомсдон, төгрөгийн ханш сулрахад хүрээд байгаа юм. Тиймээс нүүрсний экспортод тулгамдаж буй асуудлыг шийдвэрлэх хүртэл зэсийн экспортыг нэмэгдүүлэх замаар валютын нөөцөө хадгалах, ханшийн өсөлтийг тогтворжуулахад "Оюутолгой" компанитай хамтарч ажиллахаар тохиролцсон байна.
