Гэр бүл, хөдөлмөр, нийгмийн хамгааллын сайд Л.Энх-Амгалан Сэргээн засах сургалт үйлдвэрлэлийн төвийн протез, ортопедийн үйлдвэрийн төлөөлөлтэй уулзаж, хөгжлийн бэрхшээлтэй иргэдийн хиймэл эрхтэн, туслах хэрэгслийн хүртээмж, төрийн үйлчилгээний хүндрэлтэй асуудлуудыг хэлэлцлээ.
Монгол Улсад 20 мянга орчим иргэн протез, ортопед хэрэглэдэг бөгөөд тэдний хиймэл гар, хөлийг 3 жил тутамд шинэчлэх журамтай ч, зарим иргэн 10-20 жил протезоо солиулаагүй тохиолдол гарч байна. Үүний гол шалтгаан нь төрийн үйлчилгээний хүнд суртал юм.
Одоогийн байдлаар иргэд эмнэлгийн онош баталгаажуулах, нэхэмжлэх үүсгэх, холбогдох баримтуудыг бүрдүүлэх, санхүүжилтээ хүлээх гэх мэт 6 шат дамжлагатай, багадаа 21 хоног зарцуулдаг хүндрэлтэй үйл явцыг давж байж шинэ протез, ортопед авах боломжтой.
Сайд Л.Энх-Амгалан энэ үйл явцыг цахимжуулах, төрийн үйлчилгээний хүнд суртлыг арилгах шийдэл боловсруулах үүрэг өгч, иргэдэд түргэн шуурхай, хүртээмжтэй үйлчилгээ хүргэхийг онцоллоо.
Мөн Монгол Улсын протезын үйлдвэрүүд орчин үеийн 3D тоног төхөөрөмжтэй ч, мэргэжилтний дутагдал тулгамдсан асуудал болоод байна. Энэ хүрээнд:
- Нарийн мэргэжилтнүүдийг бодлогоор бэлтгэх
- Эрүүл мэнд, боловсрол, нийгмийн нөхөн сэргээх үйлчилгээг сайжруулах
- Халамжийн сангийн өртгийг нэмэгдүүлэх, шинэчлэх
- Жишиг үнийг бодох аргачлалыг боловсруулж, хүртээмжийг нэмэгдүүлэх зэрэг асуудлыг шийдвэрлэх шаардлагатай гэж үзэж байна.
