Прокурорын байгууллага хоёрдугаар сарын 10-14-ний өдрүүдэд хэрэг бүртгэлтийн 48,773, мөрдөн байцаалтын 2,877 хэрэгт хяналт тавьж, эрүүгийн 253 хэрэгт яллах дүгнэлт үйлдэн шүүхэд шилжүүлсэн талаар мэдээллээ.

Шүүхэд шилжүүлсэн зарим хэргийг дурдвал:

• Хахууль өгөх хэрэг:
  Иргэн А.Г нь Бүгд Найрамдах Сьерра Леон Улсын 7 иргэнд давуу байдал бий болгох, Монгол Улсаас гаргахгүй байх зорилгоор Гадаад иргэн, харьяатын газрын албан тушаалтанд хахууль өгөхөөр санал болгосон байна. Уг хэрэгт Эрүүгийн хуулийн 22.5 дугаар зүйл (Хахууль өгөх)-ийн дагуу яллах дүгнэлт үйлдэж, дүүргийн эрүү, иргэний хялбар ажиллагааны тойргийн шүүхэд шилжүүлжээ.

  Эрүүгийн хуулийн 22.5 дугаар зүйлд зааснаар хахууль өгсөн этгээдэд хоёр жилээс таван жил хүртэл хугацаагаар мэргэжлийн үйл ажиллагаа явуулах эрхийг хасах, 2,700-14,000 нэгжтэй тэнцэх хэмжээний торгууль ногдуулах, эсхүл зургаан сараас гурван жил хүртэл хугацаагаар хорих ял оноох заалттай.

• Төрийн өмчит үйлдвэрийн газрын албан тушаалтнуудын хэрэг:
  Нийслэлийн прокурорын газраас “Э” Төрийн өмчит үйлдвэрийн газрын албан тушаалтан Ж.Г, М.Ж, Н.Г нар нь эрх мэдэл, албан тушаалаа урвуулан ашиглаж, аж ахуйн нэгжүүдэд давуу байдал бий болгосон, хахууль авсан, үндэслэлгүйгээр хөрөнгөжсөн гэх хэргийг Эрүүгийн хуулийн:

  • 22.1 дүгээр зүйл (Эрх мэдэл, албан тушаалын байдлаа урвуулан ашиглах)
  • 22.4 дүгээр зүйл (Нийтийн албан тушаалтан хахууль авах)
  • 22.10 дугаар зүйл (Үндэслэлгүйгээр хөрөнгөжих)-т заасны дагуу яллах дүгнэлт үйлдэн Орхон аймаг дахь сум дундын эрүүгийн хэргийн анхан шатны шүүхэд шилжүүлсэн байна.

Прокурорын байгууллага мөрдөн шалгах ажиллагааны явцад дээрх хэргүүдийг хянан үзэж, холбогдох хууль зүйн зохицуулалтын дагуу шүүхэд шилжүүлсэн гэж мэдээлэв.

Эх сурвалж: Прокурорын байгууллага