Гадаад харилцааны сайд Б.Батцэцэг Германы Мюнхен хотноо энэ сарын 15-нд зохион байгуулсан “Феминист гадаад бодлогын сүлжээ”-ний сайд нарын уулзалтад оролцлоо.
Жил бүр уламжлал болгон зохион байгуулдаг энэхүү уулзалтад дэлхийн улс орнуудын гадаад хэргийн сайд нар оролцож, эмэгтэйчүүдийн эрхийг хамгаалах, тэднийг чадавхжуулах, жендэрийн тэгш байдлыг хангах зэрэг олон улсын тулгамдсан асуудлуудыг хэлэлцдэг.
Энэ удаагийн уулзалтаар шилжилтийн үеийн Сирийн эмэгтэйчүүдийг дэмжих, шийдвэр гаргах түвшинд оролцоог нь нэмэгдүүлэх талаар санал солилцож, уулзалтын дүнгээр хамтарсан мэдэгдэл гаргасан байна.
Уулзалтын үеэр сайд Б.Батцэцэг эмэгтэйчүүд, охидод тулгарч буй сорилтууд зөвхөн тодорхой бүс нутагт хязгаарлагдахгүй, дэлхийн хэмжээний асуудал болсон гэдгийг онцолж, олон улсын түвшинд хамтран ажиллах шаардлагатайг илэрхийлэв.
Эх сурвалж: Гадаад харилцааны яам
