Гэрэл зургийг: Montsame

Баян-Өлгий аймгийн ЗДТГ, Биеийн тамир, спортын газар, Соёл урлаг, аялал жуулчлал, залуучуудын газартай хамтран "Тунгалаг толбо-2025" мөсний баярыг Толбо нуурт зохион байгууллаа.

Монгол Улсын Ерөнхийлөгчийн санаачлан хэрэгжүүлж буй мөсний баяр нь “Эрүүл монгол хүн” үндэсний хөдөлгөөний хүрээнд иргэдийг эрүүл амьдралын хэв маягт уриалан цэвэр агаарт идэвхтэй хөдөлгөөнд оролцуулах, бие бялдраа чийрэгжүүлэх, өвлийн спортоор хичээллэж буй сонирхогчдын авьяас чадварыг нээн илрүүлэх, өвлийн аялал жуулчлалыг хөгжүүлэхэд ихээхэн хувь нэмэр оруулж байгаа. 

Мөсний баярт аймгийн бүх сумын төрийн албан хаагчид, төрийн бус байгууллага, аж ахуйн нэгжүүд, иргэдийн төлөөлөл, зэргэлдээ Ховд аймгийн сонирхогч иргэд зэрэг давхардсан тоогоор 2000 гаруй хүн оролцсон бөгөөд өнгөрсөн жилийн мөсний баяраас илүү өргөн хүрээг хамарч, цаашид аялал жуулчлалын эвент үйл ажиллагаа, соёл, спортын томоохон наадмын түвшинд хүргэж, жил бүр улам өргөжүүлж, баруун бүс, улсын болон олон улсын хэмжээнд зохион байгуулах боломжтой.

Баярын үеэр:

-Тэшүүр,

-Олс таталт,

-Хоккей,

-Мөсөн Сүмо,

-Мөсөн шагайн харваа,

-Мөсөн сурын харваа,

-Спорт загасчлал зэрэг спортын тэмцээн зохион байгуулж, шилдгүүдээ шалгаруулж шагнажээ.

Мөн бүргэдчдийн үзүүлбэр, угсаатны дээлтэй хос шалгаруулах уралдааныг анх удаа зохион байгуулжээ.