Монгол Улсын Их Хурлын үйл ажиллагааны ил тод, нээлттэй байдлыг нэмэгдүүлэх, парламентын талаарх иргэдийн ойлголтыг гүнзгийрүүлэх, оюутан залуусын оролцоог өргөжүүлэх зорилготой “Нээлттэй парламент” дадлагажих хөтөлбөр өнөөдөр /2025.02.14/ хаалтаа хийлээ.

20 хоног үргэлжилсэн энэхүү хөтөлбөрт дотоод, гадаадын магадлан итгэмжлэгдсэн их, дээд сургуулийн 100 оюутан хамрагдсан бөгөөд тэд парламентын үйл ажиллагаатай танилцахаас гадна хууль тогтоох үйл явцад бодитоор оролцож, УИХ-ын гишүүд, ажлын хэсгүүдтэй хамтран ажиллажээ.

УИХ-ын гишүүн Ч.Лодойсамбуу хөтөлбөрт оролцогчдод хандан, "Улс төрийн үйл ажиллагаа, төрийн ажил хоёрын ялгааг оюутнууд маань ойлгож, бодлого шийдвэр иргэдийн амьдралд хэрхэн нөлөөлдгийг биеэр мэдэрсэн байх гэж найдаж байна. Хамт ажилласан гишүүдтэйгээ үргэлж холбоотой байгаарай" хэмээн зөвлөсөн юм.

Мөн УИХ-ын гишүүн Ш.Бямбасүрэн “Оюутнууд танилцах дадлагад хамрагдаад өнгөрөх биш, цаашдаа идэвхтэй оролцож, эх орныхоо хөгжилд бодит хувь нэмэр оруулаасай гэж хүсэж байна” гэж онцолсон бол, УИХ-ын Тамгын газрын дэд дарга Э.Лхагва “Энэ удаагийн парламент “Гурван төгөлдөршил”-ийг баримталж, хүний эрхийг чухалчилж буй. Энэ хүрээнд парламентын үйл ажиллагааг олон нийтэд таниулахад оюутнуудын оролцоо чухал” хэмээн онцолжээ.

Оюутнуудын дадлага, туршлага

Хөтөлбөрийн хүрээнд 30 гаруй сургалт, лекц, чөлөөт арга хэмжээ зохион байгуулагдаж, оюутнууд хөдөө, орон нутагт томилолтоор ажилласан байна. Түүнчлэн тэд парламентын Байнгын хороод, ажлын хэсгүүдийн үйл ажиллагаанд оролцож, өөрсдийн боловсруулсан зөвлөмжүүдийг өнөөдөр УИХ-ын Тамгын газрын удирдлагуудад хүлээлгэн өгчээ.

Япон Улсын Хитоцүбаши их сургуулийн оюутан Г.Өсөхбаяр:
"Монгол Улсынхаа хууль тогтоох байгууллагад дадлага хийх боломж олгосон УИХ-ын Тамгын газар, Монголын оюутны холбоонд талархаж байна. Бид энэ хөтөлбөрийн анхдагчид. Дараагийн оюутнуудад илүү боломж нээхийн тулд хариуцлагатай байцгаая” гэж сэтгэгдлээ хуваалцсан бол,

МУИС-ийн Хууль зүйн сургуулийн оюутан Б.Ариунзаяа:
"Өөрийн үеийн хамгийн идэвхтэй 99 оюутантай хамт байлаа. Улсынхаа Төрийн ордонд ажиллах үнэхээр азтай хэрэг байлаа" хэмээн сэтгэгдлээ илэрхийлжээ.

УИХ-ын гишүүн Ч.Лодойсамбуу, Ш.Бямбасүрэн, УИХ-ын Тамгын газрын дэд дарга Э.Лхагва нар хөтөлбөрт оролцсон оюутнуудад батламж гардуулж, цаашдын ажил, амьдралд нь амжилт хүссэн байна.

Эх сурвалж: УИХ-ын хэвлэл мэдээллийн газар