Цөлжилттэй тэмцэх тухай Нэгдсэн Үндэстний Байгууллагын конвенцын талуудын 17 дугаар Бага хурал (COP17)-ыг 2026 онд Монгол Улсад зохион байгуулах бэлтгэл ажлыг нэгдсэн удирдлага, зохион байгуулалтаар хангах, салбар хоорондын үйл ажиллагааг уялдуулан зохицуулах чиг үүрэг бүхий Үндэсний хороо байгуулагдан, анхдугаар хуралдаанаа 2025 оны 2 дугаар сарын 6-ны өдөр Гадаад харилцааны яамны “Зөвшилцөл” танхимд зохион байгуулав. Хуралдааныг нээж тус Үндэсний хорооны дарга, БОУАӨ-ийн сайд С.Одонтуяа, Үндэсний хорооны дэд дарга, ГХ-ны сайд Б.Батцэцэг нар үг хэлж, холбогдох яамдын ахлах албан тушаалтнууд, Үндэсний хорооны гишүүд оролцов.
Цөлжилттэй тэмцэх НҮБ-ын конвенцын ач холбогдол, Монгол Улсын оролцоо
Цөлжилттэй тэмцэх НҮБ-ын конвенц (UNCCD) нь дэлхийн 197 улс нэгдэн орсон, олон улсын ган болон газрын доройтолтой тэмцэх чиглэлээр хэрэгжүүлж буй гол эрх зүйн баримт бичиг юм. Энэхүү конвенцын зорилго нь цөлжилт, газрын доройтол, уур амьсгалын өөрчлөлтөөс үүдэлтэй сөрөг үр дагаврыг бууруулах, тогтвортой газар ашиглалтыг дэмжихэд чиглэдэг.
Монгол Улс энэхүү конвенцын 17 дугаар талуудын бага хурлыг эх орондоо зохион байгуулахаар бэлтгэл ажлаа хангаж байна. Энэ нь олон улсын түвшинд Монгол Улсын байр суурийг бэхжүүлэхийн зэрэгцээ цөлжилт, газрын доройтол, бэлчээрийн менежмент, уур амьсгалын өөрчлөлтийн асуудлыг хэлэлцэж, бодит шийдэл гаргахад хувь нэмэр оруулах ач холбогдолтой юм.
Монгол орны нийт газар нутгийн 80 орчим хувь нь цөлжилтөд өртсөн бөгөөд газрын доройтол эрчимтэй явагдаж, ургамлын гарц буурсан, байгалийн нөхөн сэргэлтийн боломж хумигдсан нь судалгаагаар тогтоогджээ. Үүнтэй холбоотойгоор Монгол Улс олон улсын хэмжээнд бэлчээрийн тогтвортой менежментийг хөгжүүлэхэд манлайлан оролцож байна.
Монгол Улс 2022 онд НҮБ-ын тогтоолыг санаачлан олон улсын "Бэлчээр, мал аж ахуй эрхлэгчдийн жил" болгон батлуулсан. Энэ нь Монгол Улсын цөлжилт, газрын доройтлыг бууруулах чиглэлээрх санаачилгыг олон улсад өргөжүүлэх, хөрөнгө оруулалт, санхүүжилтийн боломжийг нэмэгдүүлэхэд чухал алхам болсон юм.
Коп 17 бага хурлын бэлтгэл ажил, үр нөлөө
Сүүлийн жилүүдэд Коп бага хурлуудын оролцогчдын тоо өсөж, олон улсын анхаарлын төвд орж байна.
- Коп 15 – 6,000 гаруй төлөөлөгч
- Коп 16 (2024 он) – 20,000 гаруй төлөөлөгч
- Коп 17 (Монгол Улсад болох) – 7,000-10,000 төлөөлөгч оролцох төлөвтэй
Монгол Улсад болох Коп 17 бага хурлын бэлтгэл ажлыг эрчимжүүлж, дараах гол зорилтуудыг дэвшүүлжээ.
- Монгол Улсын санаачилга, бодлогыг олон улсад сурталчлах
- Цөлжилт, газрын доройтлыг бууруулах чиглэлээр санхүүжилтийн боломжийг нэмэгдүүлэх
- Бэлчээрийн менежмент, газрын ашиглалт, уур амьсгалын өөрчлөлтөд дасан зохицох стратегийг сайжруулах
- Олон улсын хамтын ажиллагааг өргөжүүлэх, түншлэлийг нэмэгдүүлэх
Хурлын бэлтгэл ажлын хүрээнд Төв талбайгаас 7 км зайд хурлын байгууламж барихаар төлөвлөж байна. Үүнд:
- Цэнхэр бүс – 40-100 м² бүхий павильонууд
- Ногоон бүс – 5,000-15,000 м² бүхий арга хэмжээний талбай
Монгол Улс хурлын үеэр бэлчээр, газрын менежмент, тэрбум мод үндэсний хөдөлгөөн зэрэг 84 сая мод тарьсан ажлын үр дүнг танилцуулах төлөвлөгөөтэй.
Коп 17 бага хурлыг зохион байгуулах нь Монгол Улсад цөлжилттэй тэмцэх бодлогыг эрчимжүүлэх, олон улсын санхүүжилтийг нэмэгдүүлэх, хамтын ажиллагааг өргөжүүлэх боломжийг бүрдүүлэх чухал үйл явдал болж байна.
