Цахим хөгжил, инновац, харилцаа холбооны сайд Ц.Баатархүү Монгол Улс “Худал мэдээлэлтэй тэмцэх төв” байгуулахаар ажиллаж буйг мэдээллээ.

Тэрбээр төрийн байгууллагын цахим үйлчилгээг сайжруулах ажлын хүрээнд 4,000 орчим төрийн байгууллагын вэб сайтыг нэгтгэн “Gov.mn” нэгдсэн цахим хуудас бий болгох ажлыг хэрэгжүүлж байгааг онцлов. Ингэснээр иргэд төрийн байгууллагын мэдээллийг нэг дороос авах боломжтой болох юм.

Мөн И-Монголиа системд хиймэл оюунд суурилсан төрийн үйлчилгээний агент бий болгохоор ажиллаж байна.

5G сүлжээ нэвтрүүлэх ажил

Монгол Улс орон даяар 5G сүлжээ нэвтрүүлэх бэлтгэл ажлыг хангасан бөгөөд 2025 оны гуравдугаар сард сонгон шалгаруулалт эхлүүлэхээр төлөвлөжээ. 5G сүлжээ нэвтэрснээр хөдөө, хотын дижитал ялгаа арилж, одоо сумдад байгаа интернэтийн хурд 10 дахин нэмэгдэх боломжтой болох аж.

Тоолуурын автоматжуулалт

Цахилгаан, усны тоолуурын заалтыг гар аргаар уншдаг байдал өөрчлөгдөж, автомат мэдээлэл дамжуулах системд шилжих юм.

Кибер аюулгүй байдал, өгөгдөл хадгалах дата төв

Цахим шилжилтийг хангахын тулд кибер аюулгүй байдлыг сайжруулах, олон улсын түвшний дата төв байгуулах шаардлагатайг сайд Ц.Баатархүү онцлов. Дата төвийг Хүннү хотод барихаар зураг төслийн ажлыг эхлүүлсэн байна.

Эх сурвалж: Цахим хөгжил, инновац, харилцаа холбооны яам